പ്രത്യുല്‍പ്പാദന ശേഷിയല്ല, ഷണ്ഡീകരിക്കപ്പെട്ടത് ജനങ്ങളുടെ പ്രതികരണശേഷി

കേരള ജനത വിദ്യാഭ്യാസം നേടിയത് ഈ ചെന്നായ്ക്കള്‍ക്കു വേണ്ടി തെരുവില്‍ പോരടിക്കാനാണോ…?? വ്യക്തമായ ഉദ്ദേശ ലക്ഷ്യത്തോടെ, ഇവിടുള്ള മനുഷ്യരെയൊന്നാകെ വേര്‍തിരിച്ച് അവരുടെ ചുടുചോരയൂറ്റിക്കുടിച്ചു ജീവിക്കുക എന്ന ഒറ്റ ലക്ഷ്യത്തോടെ പ്രവര്‍ത്തിക്കുന്നവര്‍ ആരായാലും അവര്‍ക്കു പിന്തുണ നല്‍കുന്നത് വിവേക ബുദ്ധിയുള്ള മനുഷ്യനു ചേര്‍ന്നതാണോ…??

ഇവിടുള്ള മതവും രാഷ്ട്രീയവും ചേര്‍ന്നു ഷണ്ഡീകരിച്ചത് മനുഷ്യരുടെ പ്രത്യുല്‍പ്പാദന ശേഷിയെയല്ല, മറിച്ച് അവരുടെ പ്രതികരണ ശേഷിയെയാണ്. പറയുന്നതപ്പാടെ അക്ഷരം പ്രതി അനുസരിക്കുന്നതാണ് മഹത്തരമെന്ന് പഠിപ്പിച്ച് മതങ്ങളിവിടെ മനുഷ്യരെ ഷണ്ഡീകരിക്കുന്നു. വിദ്യ പറഞ്ഞു തരുന്നവര്‍ എന്തു പറഞ്ഞാലും അനുസരിക്കുന്നതാണു ഗുരുത്വമെന്നു പഠിപ്പിച്ച് കുട്ടികളുടെ മനസിനെയും ഷണ്ഡീകരിക്കുന്നു. മക്കള്‍ക്കു ദോഷകരമായതൊന്നും മാതാപിതാക്കള്‍ ചെയ്യില്ലെന്നും അതിനാല്‍ മറുചോദ്യം പോലും ചോദിക്കാതെ അനുസരിക്കുന്നതാണ് അനുഗ്രഹത്തിലേക്കുള്ള വഴിയെന്ന സിദ്ധാന്തം നിരത്തി മക്കളെ ഷണ്ഡീകരിക്കുന്നു. പ്രതികരിച്ചാല്‍ ജോലിപോകുമെന്നും കുടുംബത്തെപ്പോലും വെറുതെ വിടില്ലെന്നും തെണ്ടിനടക്കേണ്ടി വരുമെന്നും ഭീഷണികളുയര്‍ത്തി യൗവനത്തില്‍ നടത്തുന്ന ഷണ്ഡീകരണം. വാര്‍ദ്ധക്യം നരകതുല്യമാക്കുമെന്ന ഭീഷണിയില്‍ നടത്തുന്ന ഷണ്ഡീകരണങ്ങള്‍….. അനീതിക്കെതിരെ തല ഉയര്‍ത്തിപ്പിടിച്ചൊന്നു ചോദ്യം ചെയ്യാന്‍ പോലും ശേഷിയില്ലാത്ത ജനങ്ങളെ വാര്‍ത്തെടുത്തിരിക്കുകയാണിവിടെ. എന്തെങ്കിലുമൊരു എല്ലിന്‍ കഷണം കിട്ടിയാല്‍ ജീവിതകാലമത്രയും വായടച്ചു മിണ്ടാതിരിക്കുന്ന പാര്‍ട്ടികളുടെയും നേതാക്കളുടെയും അനുയായികളായ നാണംകെട്ട മനുഷ്യര്‍.

ഓരോ മനുഷ്യര്‍ക്കും അവരവരുടെ അഭിപ്രായങ്ങള്‍ പറയാന്‍ കഴിയുന്നിടത്താണ് ജനാധിപത്യസംവിധാനങ്ങളുടെ വിജയം. ചോദ്യം ചെയ്യാതെ അനുസരിപ്പിക്കുമ്പോള്‍ തകര്‍ത്തെറിയപ്പെടുന്നത് ജനാധിപത്യമാണ്. മുന്നോട്ടു വയ്ക്കുന്ന അഭിപ്രായങ്ങളത്രയും സ്വീകരിക്കപ്പെട്ടുകൊള്ളണമെന്നില്ല. എങ്കിലും ആ നിര്‍ദ്ദേശം പറയാനുള്ള കാരണമെന്ത്, അതു നടപ്പിലാക്കിയാല്‍ മനുഷ്യര്‍ക്കും നാടിനുമുള്ള നേട്ടമെന്ത് എന്ന് വിശദീകരിക്കാനുള്ള അവസരങ്ങള്‍ നല്‍കപ്പെടുക തന്നെ വേണം. അത്തരം ചിന്തകളുടെ അടിസ്ഥാനത്തിലാവണം ഓരോ തീരുമാനങ്ങളെടുക്കേണ്ടതും നടപ്പില്‍ വരുത്തേണ്ടതും. അല്ലാതെ, ജയിപ്പിച്ചു വിട്ടവരുടെ തോന്ന്യാസങ്ങള്‍ക്കനുസരിച്ച് നടപ്പാക്കേണ്ടതല്ല ജനങ്ങള്‍ക്കു വേണ്ടിയുള്ള തീരുമാനങ്ങള്‍.

എന്താണ് കേരളത്തിലെ ഓരോ മനുഷ്യരുടെയും കാതലായ പ്രശ്നങ്ങള്‍?? ആരോഗ്യപൂര്‍ണ്ണമായ ജീവിതം, ഭക്ഷണം, വിദ്യാഭ്യാസം, നല്ല സഞ്ചാര വഴികള്‍, പേടിക്കാതെ കിടന്നുറങ്ങാനൊരു വീട്, പ്രശ്നങ്ങള്‍ക്ക് ഉടനടി പരിഹാരം, സര്‍വ്വോപരി സമാധാനത്തോടെയും സന്തോഷത്തോടെയും അന്തസോടെയും ഈ ജീവിതം ജീവിച്ചു തീര്‍ക്കുവാനുള്ള സാഹചര്യങ്ങള്‍. ഈ സാഹചര്യം ഇവിടെയുള്ള ഓരോ മനുഷ്യര്‍ക്കും ഒരുക്കിക്കൊടുക്കാമെന്നു വാഗ്ദാനം ചെയ്താണ് ഓരോ മനുഷ്യരും തെരഞ്ഞെടുപ്പില്‍ വിജയിച്ച് നാടുഭരിക്കാനായി കച്ചകെട്ടിയിറങ്ങുന്നത്. നമ്മള്‍ വിദ്യാഭ്യാസം ചെയ്യുന്നതും പണിയെടുക്കുന്നതും ഉയര്‍ച്ചയിലേക്കു കുതിക്കാനായി പരിശ്രമിക്കുന്നതും ലഭിച്ച മികച്ച സാഹചര്യങ്ങള്‍ നിലനിര്‍ത്താനായി പരിശ്രമിക്കുന്നതും ജീവിതം സമാധാനത്തോടെയും സന്തോഷത്തോടെയും ജീവിച്ചു തീര്‍ക്കാന്‍ തന്നെ.

ജനാധിപത്യം മരിച്ചു മണ്ണടിഞ്ഞു കിടക്കുന്ന ഭൂമികയില്‍ നിന്നുകൊണ്ടാണു നമ്മള്‍ ജനാധിപത്യത്തെക്കുറിച്ചു സംസാരിക്കുന്നത്. നമ്മുടെ പ്രശ്‌നം സുരേഷ് ഗോപിയുടെ താടിയും തലമുടിയും മുഖവും രൂപവുമല്ല. പിണറായി വിജയന്‍ കോരന്റെയോ കോമന്റെയോ നായന്റെയോ നമ്പൂതിരിയുടേതോ ഇനി അതല്ല മഹാരാജാവിന്റെ മകനായാല്‍ ഇവിടെ ആര്‍ക്കെന്താണ്…?? ലാളിത്യ വാദിയായ കേജ്രിവാള്‍ നാളെമുതല്‍ കോണകമുടുത്തു നടന്നാലും ഇന്ത്യയിലെ ഒരാളെപ്പോലും അതു ബാധിക്കുന്നില്ല. കോരന്റെ മകന്‍, താടിയുള്ളവന്‍, തലപ്പാവുള്ളവന്‍, കോണകമുടുത്തവന്‍, പെണ്ണ്, ആണ്, ആ ജാതിയിലും മതത്തിലും പെട്ടവര്‍ തുടങ്ങി യാതൊരു പ്രയോജനവുമില്ലാത്ത കാര്യങ്ങള്‍ക്കു വേണ്ടി വിലപ്പെട്ട സമയവും അധ്വാനവും നശിപ്പിക്കുകയാണ് ഓരോ മനുഷ്യരും.

ഭരണകര്‍ത്താക്കള്‍ എന്ന നിലയില്‍, ജനപ്രതിനിധികള്‍ എന്ന നിലയില്‍, രാഷ്ട്രീയ നേതാക്കള്‍ എന്ന നിലയില്‍ ഇവര്‍ ജനങ്ങള്‍ക്ക് ചെയ്തു കൊടുക്കുന്നത് എന്താണ് എന്നതാണ് ഇവിടെ വിലയിരുത്തപ്പെടേണ്ടത്. സമാധാന പൂര്‍ണ്ണമായൊരു ജീവിതം ജനങ്ങള്‍ക്കു കൊടുക്കാന്‍ കഴിവില്ലാത്ത ഭരണ നേതൃത്വം ചോദ്യം ചെയ്യപ്പെടണം. മെച്ചപ്പെട്ട സൗകര്യങ്ങള്‍ ലഭിക്കാത്തതിനെതിരെ, സര്‍ക്കാര്‍ ജീവനക്കാരില്‍ നിന്നും നല്ല സേവനം കിട്ടാത്തതിനെതിരെ ജനങ്ങള്‍ ശബ്ദമുയര്‍ത്തിയേ തീരൂ.

ജാതിയുടെയും മതത്തിന്റെയും നിറത്തിന്റെയും പേരില്‍ ജനങ്ങളെ തമ്മിലടിപ്പിച്ചു കൊന്നൊടുക്കിയാല്‍, അവര്‍ നേരിടുന്ന ജീവിത പ്രശ്‌നങ്ങളെയെല്ലാം മറന്ന് പരസ്പരം കൊല്ലാനായി വാളെടുത്ത് വെട്ടിയും കുത്തിയും ചത്തുകൊള്ളുമെന്ന് ഇവിടെയുള്ള രാഷ്ട്രീയ പാര്‍ട്ടികള്‍ക്കും മതനേതാക്കള്‍ക്കും നല്ലപോലെ അറിയാം. കാരണം, വര്‍ഷങ്ങളായി അവര്‍ പയറ്റിവരുന്ന ഏറ്റവും ഫലപ്രദമായ തന്ത്രമതാണ്. ചിന്താശേഷിയില്ലാത്ത ജനങ്ങളാകട്ടെ, അപ്പക്കഷണത്തിനു വേണ്ടി ഏതെങ്കിലും പാര്‍ട്ടിക്കു വേണ്ടി ജീവന്‍ കളയാനും തയ്യാറാവുന്നു.

ഇന്ത്യ ഒരു ജനാധിപത്യരാജ്യമാണെന്ന ചിന്ത മനസിലുണ്ടാകേണ്ടത് ഇവിടെയുള്ള രാഷ്ട്രീയ നേതാക്കള്‍ക്കോ ഭരണ കര്‍ത്താക്കള്‍ക്കോ അല്ല. മറിച്ച്, ഭരിക്കുവാന്‍ വേണ്ടി തങ്ങളുടെ പ്രതിനിധികളെ തെരഞ്ഞെടുത്തു വിട്ട ഓരോ സാധാരണജനത്തിനുമാണ്. വെറുപ്പിന്റെ വിത്തുപാകി പത്തരമാറ്റ് വിളവു കൊയ്യുന്നവരെ നിലയ്ക്കു നിര്‍ത്തേണ്ടതും ഇവിടെയുള്ള ജനങ്ങളാണ്. നിങ്ങള്‍ വിശ്വസിക്കുന്ന രാഷ്ട്രീയം ഏതുമാകട്ടെ. ഏതു പാര്‍ട്ടിയില്‍പ്പെട്ട നേതാവുമാകട്ടെ, തെറ്റു ചെയ്യുന്നവരെ, വെറുപ്പു വിതയ്ക്കുന്നവരെ, മനുഷ്യജീവിതം നരകതുല്യമാക്കുന്നവരെ ചോദ്യം ചെയ്യുക എന്നത് ഓരോ വോട്ടറുടെയും കടമയും ഉത്തരവാദിത്വവുമാണ്. സ്വന്തം കടമ മറന്ന് നേതാക്കള്‍ക്കു വേണ്ടി ചേരിതിരിഞ്ഞ് ആക്രമിക്കുന്ന വോട്ടര്‍മാര്‍ തന്നെയാണ് ഇന്നത്തെ ചീഞ്ഞളിഞ്ഞ രാഷ്ട്രീയത്തിന്റെ ഉത്തരവാദികള്‍. ഓര്‍ക്കുക, പാര്‍ട്ടിക്കും നേതാക്കള്‍ക്കും വേണ്ടി കൊല്ലാനും ചാവാനും നടക്കുന്നവരല്ല, മറിച്ച്, ജാതിക്കും മതത്തിനും നിറത്തിനുമപ്പുറം ജനങ്ങള്‍ക്കു വേണ്ടി എന്തു ചെയ്തു എന്നതിന്റെ അടിസ്ഥാനത്തിലാവണം നമ്മുടെ നാടിനെ മുന്നോട്ടു നയിക്കാനുള്ളവരെ തെരഞ്ഞെടുക്കേണ്ടത്. നാം തെരഞ്ഞെടുത്തു വിട്ടവരുടെ കാലുനക്കിനായ്ക്കളാകാന്‍ ഭാരതാംബയുടെ മക്കള്‍ക്കു കഴിയില്ല. കഴിയരുത് എന്നു തന്നെയാവണം പ്രതിജ്ഞയും ജീവിത വീക്ഷണവും.

……………………………………………………………………………………………………
ജെസ് വര്‍ക്കി തുരുത്തേല്‍ & ഡി പി സ്‌കറിയ