ചുരുളഴിയുന്നത് ആരോഗ്യമേഖലയിലെ വന്‍ചതിക്കുഴി!

Jess Varkey Thuruthel 

മെത്തയില്‍ തുന്നിപ്പഠിച്ച് ഡോക്ടര്‍! രോഗികളുടെ ജീവന്‍ പന്താടി ലൈഫ് കെയര്‍!!

കോതമംഗലം കുത്തുകുഴി ലൈഫ് കെയര്‍ ആശുപത്രിയില്‍ ജനങ്ങളുടെ ജീവന്‍ പന്താടി ഒരു വ്യാജ ഡോക്ടര്‍ സേവനമനുഷ്ഠിച്ചത് ഏകദേശം മൂന്നു വര്‍ഷക്കാലം! കോതമംഗലം നിവാസിയായ ഡോക്ടര്‍ ജെന്നിഫര്‍ മാത്യുവിന്റെ 37920 എന്ന രജിസ്ട്രേഷന്‍ നമ്പര്‍ ഉപയോഗിച്ച് മുരുകേശ്വരി എന്ന സ്ത്രീയാണ് ഇവിടെ ചികിത്സ നടത്തിയിരുന്നത്. ഇവരുടെ വിദ്യാഭ്യാസ യോഗ്യതയാകട്ടെ വെറും പ്ലസ് ടു മാത്രം! രോഗികളെ ചികിത്സിക്കാനും കുത്തിവയ്ക്കാനുമെല്ലാം ഇവര്‍ പഠിച്ചെടുത്തത് മെത്തയില്‍ തുന്നിപ്പഠിച്ചുകൊണ്ടായിരുന്നു! കോതമംഗലത്തും പരിസര പ്രദേശങ്ങളിലുമായി നിരവധി ക്ലിനിക്കുകള്‍ നടത്തുന്ന സമദ് എന്നയാളുടെ ഉടമസ്ഥതയിലുള്ളതാണ് ലൈഫ് കെയര്‍ ആശുപത്രി. കൊച്ചിയിലും ഇയാള്‍ക്ക് ഇതുപോലുള്ള ക്ലിനിക്കുകള്‍ ഉണ്ടെന്നാണ് ഞങ്ങളുടെ അന്വേഷണത്തില്‍ അറിയാന്‍ കഴിഞ്ഞത്.

ഡോ മുരുകേശ്വരി എം ഡി, ജനറല്‍ ഫിസിഷ്യന്‍, ലൈഫ് കെയര്‍ ഹോസ്പിറ്റല്‍, കുത്തുകുഴി എന്ന വിലാസത്തില്‍ രോഗികളെ ചികിത്സിച്ചിരുന്ന ഈ വ്യാജഡോക്ടര്‍ക്ക് വെറും പ്ലസ് ടു വിദ്യാഭ്യാസം മാത്രമാണ് ഉള്ളത്. ഇവര്‍ എഴുതി നല്‍കിയ മരണ സര്‍ട്ടിഫിക്കറ്റില്‍പ്പോലും വലിയ പിഴവുകളാണ് ഉള്ളത്. സര്‍വ്വസാധാരണമായ പേരുകളുടെ സ്പെല്ലിംഗില്‍പ്പോലും പിഴവു സംഭവിച്ചിരിക്കുന്നു! ആലുവ മൂന്നാര്‍ റോഡില്‍, കോതമംഗലം പോലീസ് സ്റ്റേഷന്‍ പരിധിയില്‍ നിന്നും നാലോ അഞ്ചോകിലോമീറ്റര്‍ മാത്രം അകലെയാണ് ലൈഫ് കെയര്‍ ഹോസ്പിറ്റല്‍ സ്ഥിതി ചെയ്യുന്നത്.

ചികിത്സാ രംഗത്തെ വന്‍ചതിയുടെ ചുരുളഴിഞ്ഞത് ഇങ്ങനെ!

ജോലിയോടു കൂറും ആത്മാര്‍ത്ഥതയുമുള്ള രണ്ടു യുവ ഡോക്ടര്‍മാരുടെ പ്രയത്ന ഫലം കൊണ്ടാണ് ലൈഫ് കെയര്‍ ആശുപത്രിയുടെ ഈ കപട മുഖം വെളിച്ചത്തു കൊണ്ടുവരാനായത്. മൂന്നാറിലേക്കുള്ള ഒരു യാത്രയിലാണ് ഈ ആശുപത്രി ഈ ഡോക്ടര്‍മാരുടെ ശ്രദ്ധയില്‍ പെട്ടത്. ഉപരിപഠനത്തിനായി സമയം കണ്ടെത്തേണ്ടതിനാല്‍, വലിയൊരു ആശുപത്രി ചട്ടക്കൂടില്‍, എട്ടുമണിക്കൂര്‍ ജോലി ചെയ്യാന്‍ താല്‍പര്യപ്പെടാത്തതിനാലാണ് ചെറിയ ക്ലിനിക്കില്‍ വലിയ തിരക്കില്ലാത്ത ജോലി എന്ന തീരുമാനത്തിലേക്ക് ഇവര്‍ എത്തിയത്. ലൈഫ് കെയര്‍ ആശുപത്രിയുടെ കെട്ടും മട്ടും കണ്ടപ്പോള്‍ ആകര്‍ഷണം തോന്നി ഇവര്‍ ആശുപത്രി അധികാരിയായ സമദിനെ നേരിട്ടു ബന്ധപ്പെടുകയായിരുന്നു. എന്നാല്‍, ആ ആദ്യസംഭാഷണത്തില്‍, തങ്ങള്‍ക്ക് എം ഡി ഡിഗ്രിയുള്ള ഒരു ഡോക്ടര്‍ ഉണ്ടെന്നും ദിവസം 1500 രൂപ വേതനം അവര്‍ക്കു നല്‍കുന്നുണ്ടെന്നും അതിനാല്‍ തങ്ങള്‍ക്കിപ്പോള്‍ വേറൊരു ഡോക്ടറെ ആവശ്യമില്ലെന്നും സമദ് അറിയിച്ചു. എം ബി ബി എസ് പാസായ ഡോക്ടര്‍ക്കു പോലും ദിവസം 6000 രൂപ ഏറ്റവും കുറഞ്ഞ വേതനമുള്ളപ്പോള്‍ (മണിക്കൂറിന് 250 രൂപ. ദിവസം 24 മണിക്കൂര്‍ എന്ന രീതിയില്‍ ആണ് പേമെന്റ്) ഡോക്ടര്‍ ഓഫ് മെഡിസിന്‍ എന്ന ഉയര്‍ന്ന ഡിഗ്രിയുള്ള ഒരാള്‍ക്ക് ഇത്ര കുറഞ്ഞ വേതനത്തില്‍ ജോലി ചെയ്യേണ്ടി വരുന്ന ഗതികേടിനെക്കുറിച്ച് അപ്പോള്‍ അവര്‍ ചിന്തിച്ചു.

ഏതാനും ദിവസം കഴിഞ്ഞപ്പോള്‍ സമദ് ഇവരെ വിളിച്ചു. ജോലി ചെയ്യാന്‍ താല്‍പര്യമുണ്ടെങ്കില്‍ ഉടന്‍ എത്തണമെന്നും സ്വഭാവം ശരിയല്ലാത്തതിനാല്‍ ക്ലിനിക്കില്‍ ഉണ്ടായിരുന്ന ഡോക്ടറെ പറഞ്ഞയച്ചുവെന്നും സമദ് പറഞ്ഞു. കുറഞ്ഞത് ഒരു വര്‍ഷമെങ്കിലും ലൈഫ് കെയറില്‍ ജോലി ചെയ്യണമെന്നും ഇവരോടു പറഞ്ഞിരുന്നു. നല്‍കിയ താമസ സൗകര്യത്തിലും ഇവര്‍ സംതൃപ്തരായിരുന്നു. അതിനാല്‍, ആ ജോലി അവര്‍ ഏറ്റെടുത്തു. മുന്‍പ് സേവനമനുഷ്ഠിച്ച ഡോക്ടറുടെ രജിസ്ട്രേഷന്‍ നമ്പര്‍ കണ്ടപ്പോള്‍ അവര്‍ക്കൊരു നാല്‍പതു വയസിനു മുകളില്‍ പ്രായം കാണുമെന്ന് അവര്‍ ഊഹിച്ചു. ഇക്കാര്യം ലൈഫ് കെയറിലുള്ള റിസപ്ഷനിസ്റ്റുമായി പങ്കുവച്ചപ്പോള്‍, ഏകദേശം 28 വയസ് മാത്രം പ്രായമുള്ള ഒരു സ്ത്രീയായിരുന്നു ഈ ഡോക്ടര്‍ എന്നാണ് ഇവര്‍ക്ക് അറിയാന്‍ കഴിഞ്ഞത്. ഈ രജിസ്ട്രേഷന്‍ നമ്പറില്‍ 30 വയസിനു താഴെ ഒരു ഡോക്ടര്‍ കേരളത്തില്‍ ഉണ്ടാവില്ല എന്ന കാര്യം ഇവര്‍ക്ക് ഉറപ്പായിരുന്നു. ഇന്ത്യയിലെ മറ്റേതെങ്കിലും സംസ്ഥാനത്ത് രജിസ്റ്റേഷന്‍ നടത്തിയതാണോ എന്നറിയാന്‍ ഡോക്ടേഴ്സ് അസോസിയേഷന് ഈ നമ്പര്‍ നല്‍കി. അങ്ങനെ ഇന്ത്യയിലുള്ള എല്ലാ അസോസിയേഷനിലും ഈ നമ്പര്‍ അന്വേഷിച്ചു, പക്ഷേ, ഏതു സംസ്ഥാനത്തില്‍ ഈ നമ്പര്‍ അടിച്ചാലും മുരുകേശ്വരി എന്ന പേരില്‍, ഈ രജിസ്ട്രേഷന്‍ നമ്പറില്‍ ഒരു ഡോക്ടര്‍ ഇല്ല എന്നു കണ്ടെത്തി!

മുരുകേശ്വരി ജോലി ചെയ്യുന്നത് കേരളത്തില്‍ ആയതിനാല്‍ കേരളം മാത്രമേ നോക്കേണ്ടതുള്ളു. അങ്ങനെ കേരളത്തിലെ രജിസ്ട്രേഷന്‍ നമ്പര്‍ വീണ്ടും സൂക്ഷ്മമായി പരിശോധിച്ചു. അതോടെ ഈ രജിസ്ട്രേഷന്‍ നമ്പര്‍ ന്യൂറോളജിസ്റ്റായ ജെന്നിഫര്‍ മാത്യു കോവൂര്‍ എന്ന വ്യക്തിയുടേതാണെന്നു കണ്ടെത്തി. ജി പി അസോസിസിയേഷനിലെ ഡോക്ടര്‍മാരാണ് ഈ വിവരം കണ്ടെത്തിയത്.

പിന്നീട് മുരുകേശ്വരിയെക്കുറിച്ചായി അന്വേഷണം. യുക്രൈനില്‍ മെഡിസിനു പഠിക്കാന്‍ പോയ ഇവരെ യുക്രൈന്‍ സര്‍ക്കാര്‍ ഡിപോര്‍ട്ടു ചെയ്യുകയായിരുന്നുവെന്നും എം ബി ബി എസ് ആദ്യവര്‍ഷം പോലും ഇവര്‍ പൂര്‍ത്തിയാക്കിയിട്ടില്ലെന്നും ഇവരോടൊപ്പം പഠിച്ചവരില്‍ നിന്നും അറിയാന്‍ കഴിഞ്ഞു. ഇവര്‍ പഠിച്ച യൂണിവേഴ്സിറ്റിയിലും അന്വേഷണം നടത്തിയിരുന്നു. ലൈഫ് കെയറില്‍ ഇവര്‍ ജോലി ചെയ്തിരുന്ന സമയത്ത് കൈകാര്യം ചെയ്തിരുന്ന ഫയലുകളും മറ്റും പരിശോധിച്ചപ്പോള്‍ മറ്റൊരു കാര്യം കൂടി മനസിലായി. മെഡിക്കല്‍ ബുക്കില്‍പ്പോലും പരാമര്‍ശിക്കാത്ത കാര്യങ്ങളും മരുന്നുകളുടെ പേരുകളുമാണ് ഇവര്‍ ഫയലില്‍ കുറിച്ചിട്ടിരിക്കുന്നത്! ഓരോ രോഗികളുടെയും രോഗത്തിനു കൊടുക്കേണ്ട മരുന്നല്ല അവര്‍ കൊടുത്തിരിക്കുന്നത്. പനി ചികിത്സിച്ച രീതിയില്‍പ്പോലും മുഴുവന്‍ തെറ്റുകളാണ് ഇവര്‍ വരുത്തിയിരിക്കുന്നത്! മരുന്നിന്റെ പേരു പോലും എഴുതാന്‍ ഇവര്‍ക്ക് അറിയില്ല എന്നും മനസിലായി. അതോടെ ഡോക്ടര്‍മാര്‍ സമദിനെ വിളിച്ചു. തെളിവുകള്‍ നിരത്തി, സത്യം പറയണമെന്ന് ആവശ്യപ്പെട്ടു. യുവഡോക്ടര്‍മാര്‍ക്കു മുന്നില്‍ പിടിച്ചു നില്‍ക്കാന്‍ സമദിന് ആയില്ല.

മുരുകേശ്വരി വെറും പ്ലസ് ടുക്കാരിയാണ്. സമദിന്റെ ഒരു സുഹൃത്ത് സാദിഖ് ലൈഫ് കെയര്‍ മിഷന്‍ ഹോസ്പിറ്റല്‍ മുളവൂര്‍, അടിവാട് എന്ന സ്ഥലത്ത് ഉണ്ട്. സമദിന്റെ പാര്‍ട്ടണറായ സാദിഖ് ഒരു നഴ്സാണ്. ഇയാളാണ് മുരുകേശ്വരിക്ക് പരിശീലനം നല്‍കിയത്. കുത്തിവയ്പ്പെടുക്കാനായി മെത്തയില്‍ തുന്നിപ്പഠിപ്പിച്ചു! സാധാരണയായി ചെറിയ അസുഖങ്ങളുള്ള രോഗികളാണ് ഇത്തരം ക്ലിനിക്കുകളില്‍ എത്തുന്നത്. പനി, ചുമ, തലവേദന, ബി പി, ഷുഗര്‍, തൈറോയ്ഡ്, തലക്കറക്കം, കൈകാല്‍ വേദനകള്‍ തുടങ്ങിയവ. ഇത്തരം രോഗലക്ഷണങ്ങളുമായി ആരെങ്കിലുമെത്തിയാല്‍ ഏതേതു മരുന്നാണ് നല്‍കേണ്ടത് എന്നത് സംബന്ധിച്ച് ഒരു ഡയറിയില്‍ കുറിച്ചു നല്‍കി. ഇത്തരത്തില്‍ മുരുകേശ്വരിക്ക് മൂന്നു മാസത്തെ പരിശീലനം നല്‍കി കുത്തുകുഴി ലൈഫ് കെയറില്‍ ജോലി നല്‍കി.

ജനിച്ച് വെറും മാസങ്ങള്‍ മാത്രം പ്രായമുള്ള കുഞ്ഞുങ്ങള്‍ക്കു വരെ ഹൈ ഡോസിലുള്ള സ്റ്റീറോയ്ഡുകളാണ് നല്‍കിയിരിക്കുന്നത്. പിടിച്ചു കെട്ടിയതു പോലെ പനി നില്‍ക്കാന്‍ വേണ്ടിയാണ് ഇങ്ങനെ ചെയ്തത്. പെട്ടെന്നു പനി മാറുന്നതോടെ മാതാപിതാക്കള്‍ക്കും വലിയ സന്തോഷമാണ്. പനി വന്നാല്‍ പനിച്ചു മാറണമെന്ന സാമാന്യബോധം പോലും മലയാളികളില്‍ നിന്നും പൊയ്പ്പോയി. പനി 24 മണിക്കൂറെങ്കിലും നില്‍ക്കണമെന്ന സത്യം ഇവര്‍ മനസിലാക്കുന്നതു പോലുമില്ല. ഈ കുഞ്ഞുങ്ങള്‍ വളര്‍ന്ന് ഒരു മുപ്പതു വയസ് ആകുമ്പോഴേക്കും ഒരു മരുന്നും ഫലിക്കാത്ത നിലയിലേക്കു വരും. കാരണം അത്രയും ഹെവി ഡോസ് ആന്റി ബയോട്ടിക്കുകളാണ് ഇവര്‍ ഉപയോഗിച്ചിരിക്കുന്നത്. അതിനും അപ്പുറം ഡോസുള്ള ആന്റി ബയോട്ടിക് നിലവിലില്ല.