www.thamasoma.com

Most Popular

Tired of Standing in Queues? Try this

Everyone is busy standing in queues in front of ATM and bank for withdrawing money and exchanging old currency notes.

PV Sindhu win maiden China Open

Ace Indian shuttler PV Sindhu on Sunday kept her nerve and came out with a brilliant performance to defeat China's rising star Sun Yu in a pulsating final and ultimately win the China Open Superseries tournament.

Lungi Down, Lungi Up

Either to ask liquor shops to accept old notes Or ask banks to sell liquor. We can't stand in two lines each day.

This is default featured slide 4 title

Go to Blogger edit html and find these sentences.Now replace these sentences with your own descriptions.This theme is Bloggerized by Lasantha Bandara - Premiumbloggertemplates.com.

This is default featured slide 5 title

Go to Blogger edit html and find these sentences.Now replace these sentences with your own descriptions.This theme is Bloggerized by Lasantha Bandara - Premiumbloggertemplates.com.

Friday, 29 September 2017

അവള്‍ പോക്കാണത്രെ... അതുകൊണ്ട് അവളോട് അങ്ങനെയൊക്കെ......!!



ഒരു ഷോക്ക്...അതില്‍ നിന്നും പൂര്‍ണ്ണമായും മുക്തി നേടിയിട്ടില്ല. ഈ രാത്രിയിലെ എന്റെ ഉറക്കം പൂര്‍ണ്ണമായും കെടുത്തിയത് ആ വാക്കുകള്‍ തന്നെയാണ്. കാരണം ഇത്തരത്തില്‍ ചിന്തിക്കാനും ധാരാളം ആളുകള്‍ ഉണ്ട്. അതും പ്രായമായ സ്ത്രീകള്‍ വരെ..... മക്കളും മക്കളുടെ മക്കളും ഉള്ള സ്ത്രീ പുരുഷന്മാര്‍ വരെ....

'ദിലീപിനെ വളഞ്ഞിട്ട് ആക്രമിക്കുകയാണ്. ഒരു മലയാളം സിനിമയും ഞാന്‍ കാണാറില്ല, പക്ഷേ രാമലീല ഞാന്‍ കാണും. എനിക്കു പറ്റിയില്ലെങ്കില്‍ ടിക്കറ്റ് എടുത്ത് ഞാന്‍ ആരെയെങ്കിലും കാണിക്കും. ഈ ഇരയെന്നു പറയുന്നവളുടെ മൊറാലിറ്റി എന്താണ്....? അവള്‍ ആരുടെയൊക്കെ കൂടെ പോയിട്ടുണ്ടാവും....? കിടന്നു കൊടുത്തിട്ടുണ്ടാവും...? പള്‍സര്‍ സുനി അവളെ ബലാത്സംഗം ചെയ്‌തോ...? ഇല്ലല്ലോ...? സ്വന്തം ജീവിതം നശിപ്പിച്ചവളോട് ദിലീപ് പിന്നെ എങ്ങനെ പെരുമാറണമായിരുന്നു...? ഭര്‍ത്താവ് അന്യസ്ത്രീയോടൊപ്പം പോകാനുള്ള കാരണം സ്ത്രീകള്‍ തന്നെയാണ്....!' വിശ്വസിക്കാമെങ്കില്‍ വിശ്വസിച്ചോളൂ....ഈ വാക്കുകള്‍ ഞാന്‍ കേട്ടത് അത്തരം ചില സ്ത്രീ പുരുഷന്മാരില്‍ നിന്നാണ്.....

ബലാത്സംഗ ക്വട്ടേഷനിലെ ഇരക്ക് പലപുരുഷന്മാരുമായി ബന്ധമുണ്ട് എന്ന തീരുമാനത്തില്‍ ഇവര്‍ എത്തിയത് ഏതു ചേതോവികാരത്തിന്റെ പേരിലാണ് എന്ന് എനിക്കറിയില്ല. ആ പെണ്‍കുട്ടി സെലിബ്രിറ്റിയും സിനിമ ഫീല്‍ഡില്‍ ഉള്ള ഒരു വ്യക്തിയും ആണ് എന്നതാണോ അത്തരത്തില്‍ ചിന്തിക്കാന്‍ പ്രേരിപ്പിച്ചത്...? സിനിമയില്‍ നില്‍ക്കുന്ന ഒരു വ്യക്തിയെക്കുറിച്ച്, പ്രത്യേകിച്ചും നടിമാരെക്കുറിച്ച് ആര്‍ക്കും എന്തു തോന്ന്യാസവും പറയാം, ഒരു പട്ടിയും ചോദിക്കില്ല എന്നതാണ് കേരളത്തിലെ അവസ്ഥ. നടിയാണോ, അവള്‍ പിഴച്ചവളാണ് എന്നു മുദ്ര കുത്തുന്ന ആദ്യകാല നടി റോസിയുടെ തലമുറയില്‍ നിന്നും അത്രയൊന്നും മാറി ചിന്തിക്കാന്‍ മലയാളികള്‍ക്കു കഴിഞ്ഞിട്ടുമില്ല.....


 
ആ രാത്രി ഭീതിവിതച്ചത് ആ പെണ്‍കുട്ടിയുടെ മനസില്‍ മാത്രമല്ല, സത്യത്തിലും നീതിയിലും അടിയുറച്ചു വിശ്വസിക്കുന്ന ഏതൊരു ആണിന്റെയും പെണ്ണിന്റെയും മനസിലേക്ക് ഒരു കുട്ട തീ കോരിയിടുന്നതായിരുന്നു ആ പെണ്‍കുട്ടിയുടെ വാക്കുകള്‍.... അവള്‍ക്ക് അനുഭവിക്കേണ്ടിവന്ന മാനസിക ശാരീരിക പീഡനങ്ങള്‍... പള്‍സര്‍ സുനിയെന്ന പരനാറിയെ അറസ്റ്റുചെയ്ത് പോലീസ് വലിച്ചിഴച്ചു കൊണ്ടുപോയ ചിത്രത്തിലേക്കു ഞാന്‍ വീണ്ടും വീണ്ടും നോക്കി...ഒത്ത ഒരു പുരുഷന്‍... ഇത്തരം അഞ്ചാറെണ്ണത്തിന്റെ പേക്കൂത്തുകള്‍ക്ക് ഇരയായി പോയ ഒരു പാവം പെണ്‍കുട്ടി.... ഭീതി നിറഞ്ഞ കണ്ണുകള്‍. തുണി ഉരിക്കപ്പെട്ട ആ രാത്രി ഈ ജന്മം മുഴുവന്‍ അവളെ വേട്ടയാടും. അവള്‍ ആരുമാകട്ടെ... നിങ്ങള്‍ പറഞ്ഞപോലെ അവള്‍ പരപുരുഷന്മാരുടെ കിടപ്പറയില്‍ മാറിമാറി കിടന്നിട്ടുണ്ടാവാം. വേശ്യയായിരിക്കാം (അങ്ങനെയൊന്നും അല്ല എങ്കില്‍ പോലും). പക്ഷേ, അത്തരത്തിലുള്ള ഒരു സ്ത്രീയെ ആര്‍ക്കും എപ്പോള്‍ വേണമെങ്കിലും എത്ര ക്രൂരമായിട്ടും ആക്രമിക്കാം എന്നാണോ...? ഏതു പരനാറിക്കും കയറി നിരങ്ങാനുള്ളതാണോ സ്ത്രീയുടെ ശരീരവും ജീവിതവും....?

ദിലീപ് ഏതെങ്കിലും ഒരു പുരുഷനല്ല, കല കൊണ്ട് അനുഗ്രഹീതമായ, ദൈവം തലയില്‍ വലംകൈ വച്ചനുഗ്രഹിച്ച ഒരു പെണ്‍കുട്ടിയുടെ ഭര്‍ത്താവായിരുന്നു. ആ പെണ്‍കുട്ടി കേരളത്തിന്റെ ഹൃദയമിടിപ്പായിരുന്നു. അവളുടെ തെറ്റുകള്‍ പൊറുത്ത് അവള്‍ക്ക് അവര്‍ സ്വന്തം ഹൃദയത്തില്‍സ്ഥാനം നല്‍കി. ഒരു സുപ്രഭാതത്തില്‍, ആ ഹൃദയമിടിപ്പ് യാതൊരു അര്‍ഹതയുമില്ലാത്ത ഒരുവന്‍ തട്ടിയെടുത്തു. എന്നുമാത്രമല്ല, അവളെ പിന്നെ അവന്‍ പുറം ലോകം കാണിച്ചില്ല. അവന്റെ ഭാര്യ മറ്റുള്ള ആണുങ്ങളെ തൊട്ടും പിടിച്ചും അഭിനയിക്കുന്നത് ഇഷ്ടമല്ല എന്ന് അവന്‍ പരസ്യമായി പറഞ്ഞു. അവനാകട്ടെ, സുന്ദരികളായ സ്ത്രീകളോടൊപ്പം അഴിഞ്ഞാടി, പലരെയും സ്വന്തം കിടപ്പറയിലേക്കും. അവനുവേണ്ടി സ്വന്തം കലയും ജീവിതവും സ്വാതന്ത്ര്യവും ഇല്ലാതാക്കിയവളുടെ മുന്നിലേക്ക്, അതില്‍ ഏറ്റവും അടുപ്പമുള്ള കാമുകിയെ അവന്‍ കൊണ്ടുവന്നു. അവളെക്കൊണ്ട് കാമുകിയെ സത്ക്കരിപ്പിച്ചു. അവന്റെ കാമുകിക്ക് കിടക്ക വിരിക്കാനും അവള്‍ വേണമെന്ന അവസ്ഥയിലേക്ക് കാര്യങ്ങള്‍ എത്തും മുമ്പേ, അവള്‍ അവന്റെ ജീവിതത്തില്‍ നിന്നും ഒഴിഞ്ഞു പോയി.... സ്വന്തം കലയും ജീവിതവും നശിപ്പിച്ചവനെതിരെ ഒരു വാക്കു പോലും പറയാതെ.... കാമകേളികള്‍ക്കെല്ലാം സാക്ഷിയായ അവളുടെ സുഹൃത്ത്, ബലാത്സംഗ ക്വട്ടേഷന് ഇരയായ ആ പെണ്‍കുട്ടി കൂറു കാണിക്കേണ്ടത് മൊറാലിറ്റി തൊട്ടുതീണ്ടിയിട്ടില്ലാത്ത അവനോടോ...? അതോ സ്വന്തം സുഹൃത്തായ ആ പെണ്‍കുട്ടിയോടോ...? 


 
സിനിമയില്‍, ദിലീപ് മാത്രമല്ല ഭാര്യാസമേതനായി ജീവിക്കുന്നുള്ളു, മറ്റനേകം നടീനടന്മാര്‍ നല്ലൊരു കുടുംബ ജീവിതം ആസ്വദിച്ചു ജീവിക്കുന്നുണ്ട്. ഭര്‍ത്താവിന്റെ അവിഹിത ബന്ധം സഹിക്കാന്‍ മാത്രം ആ പെണ്‍കുട്ടി വേലയും കൂലിയുമില്ലാത്തവളോ കാശിനു ഗതിയില്ലാത്തവളോ അല്ലല്ലോ...

'ഇത്രയും നീചമായ കുറ്റകൃത്യം ചെയ്യാന്‍ ദിലീപ് എന്ന നടനു കഴിയില്ല, അതു ഞാന്‍ വിശ്വസിക്കില്ല' എന്നായിരുന്നു  അഭിപ്രായമെങ്കില്‍ അതിനൊരു അന്തസുണ്ടായിരുന്നു. ആ അഭിപ്രായ പ്രകടനത്തെ ഞാന്‍ മാനിക്കുമായിരുന്നു. കാരണം, ദിലീപ് തെറ്റു ചെയ്തു എന്നു വിശ്വസിക്കുന്നതുപോലെ ചെയ്തിട്ടില്ല എന്നു വിശ്വസിക്കാനും ജനാധിപത്യവ്യവസ്ഥയിലെ ജനങ്ങള്‍ക്കു സ്വാതന്ത്ര്യമുണ്ട്, കാരണം ആ കേസിന്റെ അന്വേഷണം ഇതുവരെയും പൂര്‍ത്തിയായിട്ടില്ല. കോടതി അയാള്‍ക്കു ശിക്ഷയും നല്‍കിയിട്ടില്ല.
 
പക്ഷേ, ദിലീപിന് അതില്‍ വ്യക്തമായ പങ്കുണ്ട് എന്നു വിശ്വസത്തിനാണ് കൂടുതല്‍ ബലം. എത്ര കൊടികെട്ടിയ വക്കീലിനെയും വയ്ക്കാന്‍ കീശയ്ക്കു കനമുള്ളവനാണ് ദിലീപ്. ജാമ്യം കിട്ടാന്‍ അയാളതു ചെയ്യുകയും ചെയ്തു. എന്നിട്ടും കോടതി അയാള്‍ക്കു ജാമ്യം നിഷേധിച്ചു, ഒരിക്കലല്ല, പല പ്രാവശ്യം. കീഴ്‌ക്കോടതിയും ഹൈക്കോടതിയും ദിലീപിനു ജാമ്യം നിഷേധിക്കണമെങ്കില്‍, പോലീസിന്റെ അന്വേഷണത്തില്‍ കാര്യമായ എന്തോ തെളിവു കിട്ടിയിട്ടുണ്ട് എന്നു തന്നെയാണ് അര്‍ത്ഥം.

ദിലീപിന്റെ അറസ്റ്റ് നമ്പി നാരായണന്റെതുമായി താരതമ്യം ചെയ്യുന്ന പലരുമുണ്ട്. പക്ഷേ, ദിലീപ് എന്ന വ്യക്തി പ്രശസ്തിയുടെ കൊടുമുടിയില്‍ നില്‍ക്കുന്ന ഒരാളാണ്. കേരളത്തിനകത്തും പുറത്തും അയാള്‍ക്കു വേണ്ടി കൊല്ലാനും ചാവാനും തയ്യാറുള്ള ഫാന്‍സുകളെന്ന ചാവേറുകളുള്ള, കോടികള്‍ വിലയുള്ള സെലിബ്രിറ്റി. ആരെ വേണമെങ്കിലും സ്വാധീനിക്കാന്‍ കഴിവും പണവും സ്വാധീനവുമുള്ള വ്യക്തി. ശാസ്ത്രലോകത്തിനു പുറത്ത് അധികമാരും അറിയപ്പെടാത്ത നമ്പി നാരായണനുമായി ദിലീപിനെ താരതമ്യം ചെയ്യുന്നതു തന്നെ ബാലിശമായിരിക്കും. ഇത്രയും സ്വാധീനമുള്ള ദിലീപിനെ യാതൊരു തെളിവുമില്ലാതെ അറസ്റ്റു ചെയ്യാന്‍ തക്കവണ്ണം കേരളപോലീസിന്റെ തലയ്ക്ക് മാന്ദ്യം സംഭവിച്ചിട്ടില്ല എന്നുതന്നെ ഞാന്‍ വിശ്വസിക്കുന്നു.


 
ഇപ്പോഴും ഞാന്‍ വിശ്വസിക്കുന്നു, സ്വന്തം അവിഹിത ബന്ധം ഭാര്യയ്ക്കു മുമ്പില്‍ വിളമ്പിയ ഒരുവളോടുള്ള പകവീട്ടലല്ല ഈ ബലാത്സംഗ ക്വട്ടേഷനു പിന്നില്‍. മറിച്ച് അതിനപ്പുറത്ത് മറ്റെന്തോ വലിയ ലക്ഷ്യങ്ങളുണ്ട്. ഇരയ്ക്കും പ്രതിക്കും മാത്രമറിയുന്ന ഒരു രഹസ്യമുണ്ട്. ഇപ്പോഴും ഞാന്‍ വിശ്വസിക്കുന്നു. ഇരയ്ക്ക് അറിയാം അവള്‍ ഇത്തരത്തില്‍ വേട്ടയാടപ്പെട്ടത് എന്തിന് എന്ന്. കേസ് കലങ്ങിത്തെളിയുമ്പോള്‍, ഒരുപക്ഷേ ശിക്ഷിക്കപ്പെടേണ്ടവരുടെ പട്ടികയില്‍ ഇരയും പെട്ടേക്കാം. കാരണം, വഴിയിലൂടെ നടന്നുപോയ ഒരുവളെ തട്ടിക്കൊണ്ടുപോയി മാനഭംഗപ്പെടുത്തിയതോ അപകീര്‍ത്തികരമായ ദൃശ്യങ്ങള്‍ പകര്‍ത്തിയതോ അല്ല. മറിച്ച്, വ്യക്തമായ പ്ലാനിംഗ് ഈനികൃഷ്ട കൃത്യത്തിനു പിന്നിലുണ്ട്. പോലീസിന്റെ വാക്കുകള്‍ വിശ്വസിക്കാമെങ്കില്‍, വര്‍ഷങ്ങളുടെ പ്ലാനിംഗ്. ഇരയും പ്രതിയും നടത്തിയ ആ ഇടപാട് എന്ത്...?

കഥ നന്നായാല്‍ ഒരു സിനിമ വിജയിക്കും. അതിലെ അഭിനേതാക്കളുടെ പ്രകടനം മോശമായാലും നല്ല കഥയുള്ള ഒരു സിനിമയെ അത് അത്രത്തോളം ബാധിക്കില്ല. ഇനി കഥ നല്ലതല്ലെങ്കില്‍, നടീനടന്മാര്‍ മരിച്ച് അഭിനയിച്ചാലും ആ സിനിമ രക്ഷപ്പെടുകയുമില്ല. ഒരു സിനിമയുടെ വന്‍വിജയം അതിലെ നായകന്റ നീചപ്രവൃത്തിക്കു കിട്ടിയ കൈയ്യടിയല്ല എന്ന് അഭ്യസ്ത വിദ്യരായവരെങ്കിലും മനസിലാക്കണം. അല്ലെങ്കില്‍, ഈ വിദ്യാഭ്യാസം കൊണ്ട് എന്തു പ്രയോജനം...?

ഭര്‍ത്താവിന് വഴിപിഴച്ചിട്ടുണ്ട് എങ്കില്‍, അതിന്റെ ഉത്തരവാദിത്വം ഭാര്യയുടെ, പെണ്ണിന്റെ തലയില്‍ കെട്ടിവയ്ക്കുന്ന വഴിപിഴച്ച പുരുഷന്മാരുടെ ഗണത്തില്‍ എന്റെ സുഹൃത്തും പെട്ടിട്ടുണ്ട് എന്നത് എന്നെ നടുക്കുന്നു, വല്ലാതെ വേദനിപ്പിക്കുന്നു. പുരുഷനു വഴിപിഴച്ചാല്‍ അതു ശ്രേഷ്ഠവും സ്ത്രീ വഴിപിഴച്ചു പോയാല്‍ കുടുംബത്തിന്റെ മാനം നശിപ്പിച്ചവളുമാകുന്ന നശിച്ച പുരുഷനീതിയുടെ വക്താവായി താങ്കളെ കാണേണ്ടി വന്നതില്‍ നടുക്കമല്ല, വേദന. നെഞ്ചില്‍ നെരിപ്പോടെരിയുന്ന പോലുള്ള ഒരു നീറ്റല്‍. 

---ADVERTISEMENT---


Before I finish this article I just wanted to say how important communication is and that everybody should be able to communicate all around the world but we can't do that if we don't speak the same languages. Did you learn a foreign language in school? Can you speak it fluently? Don't let those years and money spent be a waste! You can "Speak Any Language Instantly" and it's free. Everybody in the world speaks on of 15 languages. And I give you all 15 languages, for free! After finishing reading my article, please visit www.AnaEzine.webs.com because this 3-minute program will make you fluent and scientist research has shown that speaking a second language fluently will increase the size of the brain, make it disease resistant, and slow down aging so that you live longer and have a quicker mind and more productive life! Now back to my article...

---ARTICLE CONTINUED---
ദിലീപിന് ഉപ്പുമാവും പഴവുമായി സംഗീത ലക്ഷ്മണ കാത്തിരിക്കുന്നത് അവള്‍ക്ക് പൊറുതിമുട്ടിയിട്ടാണെന്ന് അവളുടെ ശരീര ഭാഷ നമുക്കു പറഞ്ഞു തരും. പക്ഷേ, ആ ഗണത്തില്‍ കുറെ മനുഷ്യര്‍ കൂടി........!!!! 

ഞാന്‍ അനോടൊപ്പമോ ഇരയോടൊപ്പമോ അവളോടൊപ്പമോ അല്ല. സത്യത്തോടൊപ്പം, നീതിയോടൊപ്പം. സത്യം ജയിക്കട്ടെ, സത്യം മാത്രം ജയിക്കട്ടെ, അതിലൂടെ എന്റെ നാടിന്റെ ശിരസും യശസും ഉയര്‍ന്നു നില്‍ക്കട്ടെ...!!


Tags: Dileep, Ramleela, Malayalam film, Dileep's Ramaleela, Pulsar Suni, Rape quotation, mafia in malayalam cinema,
Share:

Sunday, 17 September 2017

ജിമിക്കി കമ്മലും എന്റെ അമ്മയുടെ കെട്ടുതാലിയും




നാടെങ്ങും ജിമിക്കി കമ്മല്‍ തരംഗമാണ്. തുള്ളാത്തവനെയും തുള്ളിക്കുന്ന ഒരു താളം അതിലുണ്ട്. സാധാരണക്കാരനു മനസിലാകുന്ന ഭാഷയും. പക്ഷേ, മനസിന് ഉല്ലാസം തരുന്ന ഒരു പാട്ട് എന്നതിനപ്പുറം അതിനെ ബയോളജി ലാബില്‍ മാക്രിയെ കീറുന്ന പോലെ കീറിമുറിക്കുന്ന കാഴ്ചയും കാണാം. അത് എന്തുമാകട്ടെ, ആ പാട്ട് എന്നില്‍ ഉണ്ടാക്കുന്നത് എന്റെ അമ്മയുടെ കെട്ടുതാലിയാണ്.

എന്റെ അപ്പച്ചന്‍ നല്ലൊന്നാന്തരം കുടിയനായിരുന്നു. കള്ളുകുടിച്ച് പൂസായി സംസ്‌കൃത ശ്ലോകവും ചൊല്ലി ഡെസ്‌കില്‍ താളമടിച്ചിരിക്കുന്ന അപ്പനെ ഷാപ്പിനുള്ളില്‍ നിന്നും പിടിച്ചിറക്കിക്കൊണ്ടുവരുന്നത് എപ്പോഴും ഞാന്‍ തന്നെയാണ്. രണ്ടു ചേട്ടന്മാരുള്ളതിനെ അതിനൊന്നും കിട്ടാറില്ലെന്നു മാത്രമല്ല, ഷാപ്പിലിരുന്ന മാരണത്തെ വലിച്ചു വീട്ടില്‍ കൊണ്ടുവന്നതിന് എനിക്കു കണക്കിനു കിട്ടുകയും ചെയ്യും. എന്നാലും അപ്പനെ വഴിയില്‍ കളഞ്ഞിട്ടു പോരാനോ ഷാപ്പില്‍ ഉപേക്ഷിക്കാനോ ഒരു മകളാണെങ്കില്‍ പോലും ഞാന്‍ ഒരിക്കലും തയ്യാറായിട്ടില്ല. 


 
കള്ളടിച്ചാല്‍ സംസ്‌കൃത ശ്ലോകമാണ് അപ്പന്റെ പ്രത്യേകത. അത് ദൂരെനിന്നേ കേള്‍ക്കാം. അതുകൊണ്ട് ഷാപ്പില്‍ അപ്പനുണ്ടെങ്കില്‍ റോഡില്‍ കൂടി പോകുമ്പോഴേ എനിക്കറിയാം. പാട്ടു കേട്ടാല്‍ തീര്‍ച്ചയായും ഞാന്‍ ഷാപ്പില്‍ കയറി നോക്കുകയും ചെയ്യും. കാലുറക്കാത്ത അപ്പനെ താങ്ങിപ്പിടിച്ചു കൊണ്ടുപോകുമ്പോള്‍ അപ്പനാണോ ഞാനാണോ കുടിച്ചത് എന്നൊരു ശങ്ക നാട്ടുകാര്‍ക്ക് ഉണ്ടാകും. ഇതൊന്നും ഞാന്‍ കാര്യമാക്കാറുമില്ല.


ഒരിക്കല്‍, ഷാപ്പില്‍ നിന്നും പിടിച്ചിറക്കി അപ്പനെ വീട്ടില്‍ കൊണ്ടുവന്നു. വീട്ടിലെ അങ്കവും കഴിഞ്ഞ് അപ്പന്‍ കട്ടിലില്‍ കിടന്നതോടെ ഇറയത്ത് ഒരു കസേരയില്‍ ചാരി ഞാനുമിരുന്നു. വായില്‍ വരുന്നത് കോതയ്ക്കു പാട്ട് എന്ന രീതിയില്‍ പാട്ടു പാടുന്ന സ്വഭാവം എനിക്ക് അന്നുമുണ്ട്, ഇന്നും. വഴിയില്‍ നിന്നെവിടുന്നോ കിട്ടിയ പാട്ടാണ് അന്ന് ഞാന്‍ പാടിയത്.

ചുണ്ടെലി ചുണ്ടെലി മൂക്കേ പാണ്ടെലി
കെട്ടിയ പെണ്ണിന്റെ താലി കളഞ്ഞെലി....


പാട്ടുപാടി തീര്‍ന്നില്ല, ഉറങ്ങാന്‍ കിടന്ന അപ്പന്‍ കലി തുള്ളി എന്റെ മുന്നില്‍...

നീയാ പാടിയത് ഒന്നുകൂടി പാടടീ... എന്നു പറഞ്ഞു. കാലുകള്‍ നിലത്തുറയ്ക്കുന്നില്ല, പക്ഷേ എന്നെ പിടികൂടാനുള്ള ശ്രമമാണ് നടത്തുന്നത്. എന്തോ കുഴപ്പമുണ്ടെന്ന് എനിക്കു തോന്നി, അതുകൊണ്ടുതന്നെ പാട്ട് ഞാന്‍ ആവര്‍ത്തിച്ചില്ല. വലിച്ചു കീറി ഭിത്തിയില്‍ തേക്കും മുമ്പ് ഞാന്‍ ഒറ്റ ഓട്ടം. ഏറെ നേരം കഴിഞ്ഞ് പാത്തും പതുങ്ങിയും ഞാന്‍ വീട്ടില്‍ കയറിവന്നു....

അപ്പന്‍ ഉറങ്ങി, അമ്മയുണ്ട് കലിതുള്ളി മുറ്റത്ത്.... ഷാപ്പിലിരുന്ന സാധനത്തിനെ വീട്ടില്‍ കൊണ്ടുവന്ന് ഇക്കണ്ട പ്രശ്‌നങ്ങളെല്ലാം ഉണ്ടാക്കിച്ചതിനുള്ള കലിപ്പുമുണ്ട് അമ്മയുടെ മുഖത്ത്.....

എങ്കിലും ഞാന്‍ ചോദിച്ചു, അപ്പച്ചന്‍ എന്തിനാണമ്മെ എന്നോടു വഴക്കിനു വന്നത് എന്ന്.....

അരിയും സാധനങ്ങളും വാങ്ങാന്‍ അമ്മ ഊരിക്കൊടുത്ത താലിമാല പണയം വച്ച കാശുകൊണ്ടായിരുന്നു അപ്പന്റെ അന്നത്തെ അര്‍മ്മാദം. കെട്ടുതാലി കളഞ്ഞ ചുണ്ടെലിയെക്കുറിച്ചു പാട്ടുപാടിയ എന്നോട് പിന്നെങ്ങനെ അപ്പനു കലി വരാതിരിക്കും.....!!!! 


എന്തായാലും കുടിച്ച കള്ളിന്റെ കെട്ടു വിട്ടപ്പോള്‍, അപ്പന് ബോധവും തിരിച്ചു വന്നു..... ഞാന്‍ പാടിയ പാട്ടും മറന്നു.

ഒരു മകളാണെങ്കിലും, നല്ലൊരു ജോലി കിട്ടിയ ശേഷം, അപ്പച്ചന് വയറു നിറയെ കള്ളുവാങ്ങിക്കൊടുക്കണമെന്നത് എന്റെ ആഗ്രഹമായിരുന്നു. പക്ഷേ, ആ ആഗ്രഹം സാധിക്കാന്‍ അപ്പച്ചന്‍ അനുവദിച്ചില്ല. 2004 ഓഗസ്റ്റ് 8ന് എന്റെ അപ്പച്ചന്‍ മരിച്ചു. എന്നാലിപ്പോഴും ഈ പാട്ടു പാടാന്‍ മാത്രം എനിക്കു ധൈര്യമില്ല. ചുവന്നു കലങ്ങിയ കണ്ണുകളും ദേഷ്യം കൊണ്ടു വിറച്ചുള്ള അപ്പന്റെ ആ നില്‍പ്പും ഓര്‍മ്മയില്‍ നിന്നും പോകാത്തതു കൊണ്ടുതന്നെ.

---ADVERTISEMENT---

Before I finish this article I just wanted to say how important communication is and that everybody should be able to communicate all around the world but we can't do that if we don't speak the same languages. Did you learn a foreign language in school? Can you speak it fluently? Don't let those years and money spent be a waste! You can "Speak Any Language Instantly" and it's free. Everybody in the world speaks on of 15 languages. And I give you all 15 languages, for free! After finishing reading my article, please visit www.AnaEzine.webs.com because this 3-minute program will make you fluent and scientist research has shown that speaking a second language fluently will increase the size of the brain, make it disease resistant, and slow down aging so that you live longer and have a quicker mind and more productive life! Now back to my article...

---ARTICLE CONTINUED---
 

ജിമിക്കി കമ്മല്‍ കൊടുത്തു ബ്രാണ്ടി വാങ്ങിയ അപ്പനും ആ ബ്രാണ്ടി കുടിച്ചു തീര്‍ത്ത അമ്മയും ആഘോഷത്തിന്റെയല്ല, മറിച്ച് തോരാത്ത കണ്ണീരിന്റെ പ്രതീകമാണ്. ആ കണ്ണുനീര്‍ ആവോളം കുടിച്ച ആരോ ഒരാള്‍ ആ പാട്ടിന്റെ സൃഷ്ടിക്കു പിന്നിലുണ്ട്, അതില്‍ സംശയമില്ല. തോരാക്കണ്ണീരിനെ പൊട്ടിച്ചിരിയില്‍ ഒളിപ്പിച്ച ഏതോ ഒരു മകന്‍..... അതുകൊണ്ട്, വിമര്‍ശകരെ.... ആ പാട്ടിനെ വെറുതെ വിട്ടേക്കുക.... മഹാന്മാരായ പാട്ടുകാര്‍ക്കു മുന്നില്‍ ഈ കവി വെറും പൊട്ടക്കവി ആയിരിക്കാം. എങ്കിലും പൊട്ടിക്കരച്ചില്‍ കൊണ്ടു നേടാന്‍ സാധിക്കാത്ത പലതും പൊട്ടിച്ചിരി നമുക്കു നേടിത്തരും.....തീര്‍ച്ച!!!
Share:

Wednesday, 6 September 2017

നിത്യമായി ഉയിര്‍ക്കുക, ഗൗരി ലങ്കേഷ്




 കെ ആര്‍ മീര എഴുതുന്നു......

നമ്മുടെ സ്വാതന്ത്ര്യത്തിന്റെ ഏഴു പതിറ്റാണ്ടുകള്‍ എത്ര വ്യര്‍ത്ഥവും നിഷ്ഫലവുമായിത്തീര്‍ന്നിരിക്കുന്നു എന്നു വിളിച്ചു പറയുന്ന ഒരു രാത്രിയാണിത്.

'ഭഗവാന്റെ മരണം' എന്ന കഥ ഡോ. കെ. എസ്. ഭഗവാന്‍ കന്നഡയിലേക്കു പരിഭാഷപ്പെടുത്തിയപ്പോള്‍ അതു പ്രസിദ്ധീകരിച്ചത് ഗൗരി ലങ്കേഷ് ആയിരുന്നു.

കഥ വായിച്ച് ഗൗരി ലങ്കേഷ് ആവേശഭരിതയായെന്നും ഇതുപോലെ ഒരു കഥ കന്നഡയില്‍ ആരും എഴുതിയില്ലല്ലോ എന്നു നിരാശ പ്രകടിപ്പിച്ചെന്നും ഡോ. ഭഗവാന്‍ പറഞ്ഞറിഞ്ഞതു മുതല്‍ അവരെ കാണാന്‍ ആഗ്രഹിച്ചിരുന്നതാണ്.

 

ബാംഗ്ലൂര്‍ ഫെസ്റ്റിവലിനു പോയപ്പോള്‍ മറ്റു തിരക്കുകള്‍ മൂലം, അതു സാധിച്ചില്ല.

ഇനി സാധിക്കുകയുമില്ല.

കാരണം, ഗൗരി ലങ്കേഷ് കൊല്ലപ്പെട്ടിരിക്കുന്നു.
അമ്പത്തിയഞ്ചാം വയസ്സില്‍!

എഴുപത്തേഴുകാരനായിരുന്ന ഡോ. കല്‍ബുര്‍ഗി കൊല്ലപ്പെട്ട അതേ വിധം.

രാത്രി എട്ടുമണിക്ക് ഓഫിസില്‍നിന്നു തിരികെയെത്തി ഗേറ്റു തുറക്കുകയായിരുന്നു. അപ്പോഴാണ് ആക്രമണമുണ്ടായത്. മോട്ടോര്‍സൈക്കിളില്‍ എത്തിയ മൂന്നു പേര്‍ വെടിവയ്ക്കുകയായിരുന്നു. അവര്‍ ഏഴു റൗണ്ട് വെടിവച്ചു. മൂന്നു വെടിയുണ്ടകള്‍ ഗൗരി ലങ്കേഷിന്റെ ശരീരത്തെ തുളച്ചു. ഒന്ന് നെറ്റിയില്‍, ഒന്ന് കഴുത്തില്‍, ഒന്ന് നെഞ്ചില്‍. നാലു വെടിയുണ്ടകള്‍ ലക്ഷ്യം തെറ്റി ഭിത്തിയില്‍ തറച്ചു.'
'ഈ നാട്ടില്‍ യു.ആര്‍. അനന്തമൂര്‍ത്തിയും ഡോ. കല്‍ബുര്‍ഗിയും എന്റെ പിതാവ് പി. ലങ്കേഷും പൂര്‍ണ ചന്ദ്ര തേജസ്വിയും ഒക്കെയുണ്ടായിരുന്നതാണ്. അവരൊക്കെ ജവഹര്‍ലാല്‍നെഹ്‌റുവിനെയും ഇന്ദിരാഗാന്ധിയെയും രാജീവ് ഗാന്ധിയെയും ഒക്കെ നിശിതമായി വിമര്‍ശിച്ചിട്ടുള്ളവരുമാണ്. പക്ഷേ അതിന്റെ പേരില്‍ അവര്‍ ശാരീരികമായി ആക്രമിക്കപ്പെട്ടിരുന്നില്ല. കൊല്ലപ്പെട്ടിരുന്നില്ല, അവര്‍ക്കു വധഭീഷണികള്‍ ലഭിച്ചിരുന്നില്ല' എന്നു ഗൗരി ലങ്കേഷ് പറഞ്ഞിട്ട് അധികം നാളുകള്‍ കഴിഞ്ഞിട്ടില്ല.
 
'എന്റെ രാജ്യത്തെ ഭരണഘടന എന്നെ പഠിപ്പിക്കുന്നത് മതനിരപേക്ഷത പാലിക്കുന്ന പൗരനാകാനാണ്. അല്ലാതെ വര്‍ഗീയ വാദിയാകാനല്ല. അതുകൊണ്ട്, വര്‍ഗീയവാദികളെ എതിര്‍ക്കേണ്ടത് എന്റെ കടമയാണെന്നു ഞാന്‍ കരുതുന്നു' എന്ന് ഉറക്കെപ്പറയാന്‍ അവര്‍ അധൈര്യപ്പെട്ടിട്ടില്ല.

തളംകെട്ടി നില്‍ക്കുന്ന രക്തത്തില്‍ വീണു കിടക്കുന്ന മെലിഞ്ഞ ശരീരം.

തുളഞ്ഞു പോയ ഒരു കണ്ഠം, ഹൃദയം, മസ്തിഷ്‌കം.

അതുകൊണ്ട്?

വെടിയുണ്ടകളേറ്റു തൊണ്ട തുളഞ്ഞാല്‍ അവരുടെ ശബ്ദം നിലയ്ക്കുമോ? വാക്കുകളും അര്‍ത്ഥങ്ങളും ഇല്ലാതാകുമോ?

കൊല്ലപ്പെടുന്നവര്‍ക്കാണ് കൊല്ലുന്നവരേക്കാള്‍ ദീര്‍ഘായുസ്സ്. അവര്‍ പിന്നെയും പിന്നെയും ഉയിര്‍ത്തെഴുന്നേറ്റുകൊണ്ടിരിക്കും.

Share:

Tuesday, 22 August 2017

സ്ത്രീ ഒളിച്ചോട്ടങ്ങളില്‍ കാമം മാത്രം കാണുന്നവരുടെ ശ്രദ്ധയ്ക്ക്......


 

സ്ത്രീയ്ക്ക് കൂച്ചു വിലങ്ങ് പണിയുന്നവരും അതിലവരെ നിര്‍ബന്ധപൂര്‍വ്വം തളയക്കുന്നവരും ഈ ലേഖനം വായിക്കണം. അടക്കമില്ലാത്തവളെന്നും കാമഭ്രാന്തു പിടിച്ചവളെന്നും അവളെ അധിക്ഷേപിക്കുന്നവര്‍ക്കു വേണ്ടിയാണീ ലേഖനം. ആദ്യമേ പറയട്ടെ, ഈ ലേഖനമെഴുതിയത് തമസോമയുടെ ചീഫ് എഡിറ്റര്‍ ജെസി തുരുത്തേല്‍ അല്ല. ഇത്ര മനോഹരമായി സ്ത്രീമനസ് വായിച്ചയാള്‍ ഒരു പുരുഷനാണ്, അതും ഒരു മുസ്ലീം....! അതേ, സ്ത്രീ ശരീരത്തിലെ കണ്ണുമാത്രം അവശേഷിപ്പിച്ച് ബാക്കിയെല്ലാ ശരീര ഭാഗങ്ങളും തുണിയില്‍ പൊതിഞ്ഞു കൊണ്ടുനടക്കുന്ന മതവിഭാഗത്തില്‍ പെട്ട ഒരു പുരുഷന്‍. പ്രായപൂര്‍ത്തിയാകും മുമ്പേ സ്ത്രീയെ കെട്ടിച്ചില്ലെങ്കില്‍ അവള്‍ വെടക്കായി പോകുമെന്നു വിശ്വസിക്കുന്ന ഒരു മതത്തില്‍ പെട്ട പുരുഷന്‍.... പക്ഷേ, ഈ പുരുഷനോളം സ്ത്രീമനസിനെ വായിച്ചവര്‍ ആരാണുള്ളത്.....? വായിക്കുക, വിലയിരുത്തുക, ഒപ്പം സ്വന്തം മനസിനെയും ഒന്നു വിശകലനം ചെയ്യുക....നജീബിന്റെ ലേഖനം ഇതാ....


ജീവപര്യന്തം തടവായി മാറുന്ന ദാമ്പത്യം

By Najeeb Moodadi

കെട്ടിയവനെ വേണ്ടെന്ന് വെച്ച് ഒരു പെണ്ണ് വേറൊരുത്തന്റെ കൂടെ പോയി എന്ന് കേട്ടാലുടന്‍, 'കാമഭ്രാന്ത് മൂത്തിട്ട് ഇറങ്ങിപ്പോയവള്‍' എന്നാണ് നമ്മുടെ വിധിയെഴുത്ത്. ഇതിലും മോശമായൊരു ആക്ഷേപം ഒരു പെണ്ണിനെ കുറിച്ച് പറയാനില്ല എന്നത് കൊണ്ട് തന്നെ, 'വേലിചാടാന്‍' ഉദ്ദേശമുള്ള സകല 'അവളുമാര്‍ക്കും' ഒരു താക്കീത് എന്ന നിലക്ക് കൂടിയാണ് ഈ കടുത്ത പ്രയോഗം. 'മാനവും മര്യാദയും' ഉള്ള, 'കുടുംബത്തില്‍ പിറന്ന' ഒരുത്തിക്കും മേലില്‍ ഈ തോന്നല്‍ ഉണ്ടാവാന്‍ പാടില്ല എന്നൊരു ഉദ്ദേശം കൂടി 'കാമഭ്രാന്ത്' എന്ന മോശപ്പെട്ട പ്രയോഗത്തിന് പിന്നില്‍ ഉണ്ട്.

വിവാഹപ്പിറ്റേന്ന് തന്നെ ഭര്‍ത്താവിനെ വേണ്ടെന്ന് വെക്കുന്നത് മുതല്‍, പേരക്കുട്ടികള്‍ ആയ ശേഷം, ഫേസ്ബുക്കിലൂടെ പരിചയപ്പെട്ടവന്റെ കൂടെ ഒളിച്ചോടുന്നതും, അമ്മയുടെ സഹായത്തോടെ കാമുകനായ ബംഗാളിയെ കൊണ്ട് ഭര്‍ത്താവിനെ കൊല്ലിച്ചത് വരെയുമുള്ള വാര്‍ത്തകള്‍ കേള്‍ക്കുമ്പോഴും നമ്മളിങ്ങനെ കോലായയിലെ ചാരുകസേരയില്‍ കിടന്ന് അകത്തു കേള്‍ക്കാന്‍ വിധം ഉറക്കെ, 'പെണ്ണിന്റെ കാമപ്രാന്ത്' എന്ന് രോഷം കൊണ്ട് കാലു വിറപ്പിക്കുമ്പോഴും, അകത്തളങ്ങളില്‍ അമര്‍ന്നു പോകുന്ന നിശ്വാസങ്ങളുടെ കാരണം ഇത് മാത്രമല്ല എന്ന് തിരിച്ചറിയുന്നുണ്ടോ.


 
ദാമ്പത്യത്തില്‍ രതി മാത്രമല്ല, സ്‌നേഹം പ്രണയം ആദരവ് അംഗീകാരം പരിഗണന മതിപ്പ് കരുതല്‍ ഉത്തരവാദിത്തബോധം സുരക്ഷിതത്വം തുടങ്ങിയ ഒരുപാട് കാര്യങ്ങള്‍ ജീവിത പങ്കാളിയില്‍ നിന്ന് പെണ്ണ് ആഗ്രഹിക്കുന്നുണ്ടെന്നും, അങ്ങിനെ പലതിന്റെയും അഭാവത്തില്‍ നിന്നുണ്ടാകുന്ന അങ്ങേയറ്റം മടുപ്പില്‍ നിന്നാണ് പലപ്പോഴും ഒരു കുടുംബിനി അവിഹിതബന്ധത്തിന് മുതല്‍ ഒളിച്ചോട്ടത്തിന് വരെ ധൈര്യം കാണിക്കുന്നതെന്നും അറിയാത്തവരല്ല എല്ലാറ്റിനും 'കാമഭ്രാന്ത്' എന്ന ലേബല്‍ ചാര്‍ത്തി ഒതുക്കാന്‍ ശ്രമിക്കുന്നത്. വിദ്യാഭ്യാസവും അറിവും ആത്മവിശ്വാസവും തന്റേടവും പ്രതികരണശേഷിയും ഉള്ള വനിതകള്‍ ഏറി വരുമ്പോള്‍, 'ഇരുട്ടു കൊണ്ടുള്ള ഈ ഓട്ടയടക്കല്‍' എത്രകാലം തുടരാന്‍ കഴിയും എന്നാണ് ചിന്തിക്കേണ്ടത്.

'കാമഭ്രാന്ത്' എന്ന് നാം മോശപ്പെടുത്തി പറയുന്ന ലൈംഗിക അസംതൃപ്തി തന്നെയാണ് പ്രശ്‌നം എന്ന് കരുതുക. യഥാര്‍ത്ഥത്തില്‍ വിവാഹിതയായ ഒരു സ്ത്രീക്ക് ഭര്‍ത്താവില്‍ നിന്ന് ലഭിക്കേണ്ട ന്യായമായ ഒരു അവകാശം മാത്രമല്ലേ അത്. ജീവിവര്‍ഗ്ഗങ്ങളില്‍ പലതിനും ലൈംഗികത എന്നത് സാന്താനോത്പാദനതിനുള്ള ഉപാധി മാത്രമാണെങ്കില്‍, മനുഷ്യനെ സംബന്ധിച്ചെടുത്തോളം ഏറ്റവും മനോഹരമായ അനുഭൂതിയാണല്ലോ രതി. മാനസികമായും ശാരീരികമായും അതിലൂടെ ലഭിക്കുന്ന അനന്ദത്തിന് പകരം വെക്കാന്‍ പറ്റുന്ന ഒന്നും ഇല്ലെന്നും, ആണിന്റെയും പെണ്ണിന്റെയും ശരീരഘടന പോലും അത് ഏറ്റവും മനോഹരമായി ആസ്വദിക്കാന്‍ പറ്റിയ രീതിയില്‍ ആണ് സൃഷ്ടിക്കപ്പെട്ടത് എന്നുമിരിക്കെ ഒരാളുടെ വിരക്തിയോ കഴിവുകേടോ മൂലം പങ്കാളിക്ക് ആയുഷ്‌കാലം മുഴുവന്‍ ആ അനുഭൂതി നിഷേധിക്കപ്പെടുന്നത് ന്യായമാണോ?

ലൈംഗിക ശേഷിക്കുറവ് ആണ് പ്രശ്‌നമെങ്കില്‍ വിവാഹത്തിന് മുമ്പ് തന്നെ കണ്ടെത്താം എന്നിരിക്കെ, അത് മറച്ചു വെച്ചു കൊണ്ട് ഒരു പെണ്ണിനെ വിവാഹം ചെയ്യുന്നത് അക്രമമല്ലേ. അതിനുമപ്പുറം, അശഌല കഥകളും ദൃശ്യങ്ങളും സൃഷ്ടിച്ച മിഥ്യാധാരണയാണ് പലരുടെയും കിടപ്പറയിലെ ശത്രു. അതുപോലൊന്നും ആയില്ലെങ്കില്‍ പങ്കാളിയെ തൃപ്തിപ്പെടുത്താന്‍ കഴിയില്ല എന്ന അബദ്ധധാരണയില്‍ സംഗതി വേണ്ടെന്ന് വെക്കുന്നവരും, ഉത്കണ്ഠമൂലം എവിടെയും എത്തിക്കാന്‍ കഴിയാത്തവരുമാണ് ഇക്കൂട്ടര്‍.

പണവും പൊങ്ങച്ചവും സാമൂഹ്യമാന്യതയും ഒക്കെയാണ് ജീവിതം എന്ന ധാരണയില്‍ അതിനുവേണ്ടിയുള്ള മണ്ടിപ്പാച്ചിലില്‍ ഊണിലും ഉറക്കത്തിലും പിരിമുറുക്കത്തോടെ കഴിയുന്നവരാണ് മറ്റൊരു കൂട്ടര്‍. കിടപ്പറയില്‍ പോലും ഇവ്വിധ ചിന്തകളുമായി കഴിയുന്ന ഇവര്‍ക്ക് രതി പോലും ഒരു ചടങ്ങ് മാത്രമാണ്. മദ്യത്തിനും മയക്കുമരുന്നിനും മൊബൈല്‍ ഫോണിനും അടിമകളായിപ്പോയവരുടെ കാര്യവും വിഭിന്നമല്ല.

ഇവര്‍ക്കൊക്കെയും ഭാര്യയെ ലൈംഗീകമായി തൃപ്തിപ്പെടുത്താന്‍ കഴിയുന്നില്ല എന്ന അപകര്‍ഷത, അവളെ നിരന്തരമായി കുറ്റപ്പെടുത്തുന്നതിലും ദേഷ്യവും വഴക്കും അധികാരം കാണിക്കലും ഒക്കെയായി ദാമ്പത്യത്തെ നരകമാക്കി മാറ്റുന്നു എന്നതല്ലേ സത്യം.

ഭര്‍ത്താവില്‍ നിന്നും ഒരു പെണ്ണ് ആഗ്രഹിക്കുന്നത് ലൈംഗികസുഖം മാത്രമല്ല. തന്നോട് ഏറെ നേരം സംസാരിക്കാനും നിസ്സാര കാര്യങ്ങള്‍ ആണെങ്കിലും ക്ഷമയോടെ കേള്‍ക്കാനും. മസിലുപിടിത്തം ഇല്ലാതെ ഇടപെടാനും തമാശ പറയാനും സ്‌നേഹിക്കാനും പരിഗണിക്കാനും അംഗീകരിക്കാനും ഗംഭീരമായി പ്രണയിക്കാനും കഴിയുന്ന പുരുഷനെയാണ് അവള്‍ ഇഷ്ടപ്പെടുന്നത്. ശരീര സൗന്ദര്യമോ രൂപ സൗകുമാര്യമോ പണമോ സമൂഹത്തിലെ സ്ഥാനമോ ഒന്നും അവളുടെ വിഷയമേ അല്ല. ഇതൊക്കെ ഉള്ളവനെ വിട്ട് കൂലിപ്പണിക്ക് വന്ന അന്യ സംസ്ഥാനക്കാരന്റെ കൂടെ പെണ്ണ് ഒളിച്ചോടിപ്പോകുന്നതിന്റെ കാരണം ആലോചിച്ചാല്‍ ഇത് മനസ്സിലാവും.

ലൈംഗികതയാണ് പെണ്ണിന്റെ ഒളിച്ചോട്ടത്തിന് കാരണമെങ്കില്‍, ജന്മനാ ചലനശേഷിയില്ലാത്തവരെ പ്രണയിച്ചു ഭര്‍ത്താവായി സ്വീകരിക്കുന്ന, അപകടത്തില്‍ നട്ടെല്ല് തകര്‍ന്നുപോയ ഭര്‍ത്താവിനെ ശുശ്രൂഷിച്ച് ആഹ്ലാദത്തോടെ ജീവിക്കുന്ന എത്രയോ സ്ത്രീകള്‍ നമുക്ക് ചുറ്റും ഇല്ലേ. പെണ്ണിനാണ് ഇങ്ങനെ ഒരു അവസ്ഥയെങ്കില്‍ ഇങ്ങനെ കൂടെ നില്‍ക്കാന്‍ എത്ര പുരുഷന്മാര്‍ ഉണ്ടാകും എന്നും ഓര്‍ക്കുക. അപ്പോള്‍ ആര്‍ക്കാണ് കാമം അടക്കാന്‍ കഴിയാത്തത്.

കൊല്ലങ്ങളോളം കൂടെ കഴിഞ്ഞ ഭര്‍ത്താവ് ഒരിക്കല്‍ പോലും നല്ലത് പറയാത്ത തന്റെ സൗന്ദര്യത്തെ, ശാരീരത്തെ, പാചകത്തെ കുറിച്ചൊക്കെ ഏതോ ബംഗാളിയില്‍ നിന്ന് അഭിനന്ദനത്തോടെയും ആദരവോടെയും നല്ല വാക്ക് കേള്‍ക്കാന്‍ കഴിഞ്ഞവള്‍ ഇനിയുള്ള ജീവിതം അവന്റെ കൂടെയങ്ങ് പൊറുക്കാം എന്ന് കരുതിയാല്‍ അവളെ കുറ്റം പറഞ്ഞിട്ട് കാര്യമുണ്ടോ?

 

തൊട്ടിലില്‍ കിടക്കുന്ന കുഞ്ഞു പോലും പ്രിയപ്പെട്ടവരുടെ ശ്രദ്ധയും പരിഗണനയും കിട്ടാന്‍ എങ്ങനെയൊക്കെ ശ്രമിക്കും എന്നോര്‍ത്താല്‍ അംഗീകാരവും പരിഗണനയും ഒക്കെ ആഗ്രഹിക്കുക എന്നത് മനുഷ്യസഹജമാണെന്നു മനസ്സിലാവും. സ്ത്രീകള്‍ക്ക് പ്രത്യേകിച്ചും. ഏറ്റവും വേണ്ടപ്പെട്ടവരില്‍ നിന്നുള്ള അംഗീകാരമാണ് ആരും ആഗ്രഹിക്കുന്നത്. അത് മനസ്സിലാക്കപ്പെടാതെ പോയാല്‍ എന്ത് ചെയ്യും?

അവഗണന മാത്രമല്ല വഴക്കും പരിഹാസവും ഒന്നിനും കൊള്ളാത്തവള്‍ എന്ന കുറ്റപ്പെടുത്തലും ഒക്കെ ഒരു പെണ്ണിന്റെ ദാമ്പത്യ ജീവിതത്തെ നരകമാക്കുന്നുണ്ട്. സ്വവര്‍ഗ്ഗരതിയും മദ്യപാനവും സിഗരറ്റ് വലിയും മുതല്‍ വൃത്തിയില്ലായ്മയും വായ്‌നാറ്റവും വരെ സഹിക്കേണ്ടി വരുന്ന പെണ്ണിനോട് മാത്രം ക്ലാസ്സെടുത്തു കൊടുക്കേണ്ട കാര്യമല്ല ദാമ്പത്യത്തിന്റെ പവിത്രതയും മഹത്വവും. മറ്റുള്ളവര്‍ക്ക് മുന്നില്‍ മാതൃകാ ദമ്പതികളായി അസൂയപ്പെടുത്തുന്ന പലരുടെയും ദാമ്പത്യം പൊരുത്തപ്പെടാനാകാത്ത വിയോജിപ്പിന്റെയും പൊട്ടിത്തെറികളുടെയും പുകയുന്ന അഗ്‌നി പര്‍വ്വതങ്ങളാണ്.

കുഞ്ഞുങ്ങളെ ഉപേക്ഷിച്ചും ഭര്‍ത്താവിനെ വേണ്ടെന്ന് വെച്ചും ആരുടെയെങ്കിലും കൂടെ ഇറങ്ങിപ്പോകുന്നത് മഹത്തായ കാര്യമാണ് എന്നല്ല പറഞ്ഞു വരുന്നത്. ഇത്രയും തന്റേടം കാണിക്കുന്ന പെണ്ണിന് ദാമ്പത്യം അത്രക്ക് മടുത്തെങ്കില്‍ നിയമപ്രകാരം വേര്‍പിരിയാനും പുനര്‍വിവാഹം ചെയ്യാനും ഉള്ള മാന്യമായ വഴിയുണ്ട്. വീട്ടുകാരെയും കുടുംബക്കാരെയും ഒക്കെയും മാനം കെടുത്തിയും വേദനിപ്പിച്ചും മക്കളെ എന്നെന്നേക്കുമായി അപകര്‍ഷതയിലേക്കും അപമാനത്തിലേക്കും തള്ളിവിട്ടും ഉള്ള ഒളിച്ചോട്ടവും അവിഹിതവുമൊന്നും ഒരിക്കലും ന്യായീകരിക്കപ്പെടാവുന്നതല്ല.

എന്നാല്‍ അത്തരം വാര്‍ത്തകള്‍ കേള്‍ക്കുമ്പോള്‍ കാമഭ്രാന്ത് എന്ന് ഒറ്റയടിക്ക് അടക്കിക്കളയുന്ന നാം, കുടുംബത്തിന്റെ മാനമോര്‍ത്തും, ഒളിച്ചോടാന്‍ ധൈര്യമില്ലാതെയും ദാമ്പത്യം ഒരു ജീവപര്യന്തം തടവുശിക്ഷയായി അനുഭവിച്ചു തീര്‍ക്കുന്ന ഒരുപാട് സ്ത്രീകള്‍ നമുക്ക് ചുറ്റും ഉണ്ടെന്ന് ഓര്‍ക്കണം. ജീവിതത്തില്‍ നിന്ന് തന്നെ ഒളിച്ചോടാനുള്ള മോഹത്തില്‍ നിന്ന് അവരെ പിന്തിരിപ്പിക്കുന്നത് മക്കളുടെ മുഖം മാത്രമാണ്.

www.AnaEzine.webs.com
 
അതുകൊണ്ട് തന്നെ ഏതെങ്കിലും പെണ്ണിന്റെ ഒളിച്ചോട്ടത്തിന്റെയും അവിഹിതത്തിന്റെയും കഥ കേള്‍ക്കുമ്പോള്‍ അതൊക്കെ മറ്റേതിന്റെ കുറവാണ് എന്ന് ആക്ഷേപിക്കുന്നത് മുഴുത്ത അശ്ലീലമാണ്.

ദാമ്പത്യം എന്നത് അടിമ ഉടമ ബന്ധം അല്ലെന്നും ജീവിത പങ്കാളി എന്നാല്‍ തുല്യ അവകാശമുള്ള ഒരു വ്യക്തിയാണ് എന്നും, വിശേഷിച്ചും പെണ്ണിനെ സംബന്ധിച്ചെടുത്തോളം സ്‌നേഹവും പരിഗണനയും ലാളനയും ഒക്കെ മറ്റെന്തിനേക്കാളും വലുതാണ് എന്നതും അവളെ കേള്‍ക്കാനും ചേര്‍ത്തു പിടിക്കാനും കൂടെ ഉണ്ടെന്ന് ധൈര്യം പകരാനും ഒക്കെ മനസ്സുള്ള ആണിനെ ആണ് മസില്‍ പവറിനെക്കാള്‍ അവള്‍ ഇഷ്ടപ്പെടുന്നത് എന്ന ബോധവും ഇല്ലാതെ എല്ലാറ്റിനും കാമഭ്രാന്ത് എന്ന് ഒച്ചവെച്ചുകൊണ്ടിരുന്നാല്‍ മതിയോ?

പരസ്പരം മനസ്സിലാക്കുന്നവരുടെ സന്തോഷം നിറഞ്ഞ ദാമ്പത്യമാണ് ആഹ്ലാദം നിറഞ്ഞ കുടുംബവും സമൂഹവും സൃഷ്ടിക്കുന്നത്.

കൂടെക്കിടക്കുമ്പോഴും മനസ്സ് കൊണ്ട് ഒളിച്ചോടുന്ന ദമ്പതികള്‍ ഏറി വരുന്നൊരു കാലത്ത് പരസ്പരം മനസ്സിലാക്കാനും സ്‌നേഹിക്കാനുമുള്ള
തിരിച്ചറിവുകള്‍ ഉണ്ടാകട്ടെ.

---ADVERTISEMENT---

Before I finish this article I just wanted to say how important communication is and that everybody should be able to communicate all around the world but we can't do that if we don't speak the same languages. Did you learn a foreign language in school? Can you speak it fluently? Don't let those years and money spent be a waste! You can "Speak Any Language Instantly" and it's free. Everybody in the world speaks on of 15 languages. And I give you all 15 languages, for free! After finishing reading my article, please visit www.AnaEzine.webs.com because this 3-minute program will make you fluent and scientist research has shown that speaking a second language fluently will increase the size of the brain, make it disease resistant, and slow down aging so that you live longer and have a quicker mind and more productive life! Now back to my article...

---ARTICLE CONTINUED---

ഇതേപോലെ ദാമ്പത്യജീവിതത്തില്‍ സ്‌നേഹരാഹിത്യവും അവഗണനയും ലൈംഗിക അസംതൃപ്തിയും ഒക്കെ അനുഭവിക്കുന്ന പുരുഷന്മാരില്ലേ എന്ന് സ്വാഭാവികമായും ചോദ്യമുണ്ടാകും. തീര്‍ച്ചയായും ഉണ്ട്. പക്ഷെ പെണ്ണിനെ പോലെ ഇതൊന്നും തുറന്നു പറയാനോ പരിഹാരം തേടാനോ കഴിയാത്ത അവസ്ഥയല്ല പുരുഷന് എന്നതൊരു യാഥാര്‍ഥ്യം മാത്രമാണല്ലോ.
Share:

Monday, 31 July 2017

കുടുംബം അപകടത്തില്‍ പെട്ടതറിഞ്ഞ് ഉള്ളുലഞ്ഞ് എത്തിയ ആ പ്രവാസിയെ മദ്യപാനിയാക്കി എയര്‍പോര്‍ട്ട് ഉദ്യോഗസ്ഥര്‍



പിതാവിന് സുഖമില്ലെന്നറിഞ്ഞ് നാട്ടിലെത്തിയതായിരുന്നു ആ യുവാവ്. നാട്ടിലെത്തി ഒരാഴ്ച കഴിഞ്ഞപ്പോള്‍, വിദേശത്തുള്ള സുഹൃത്ത് വിളിച്ചു, ഭാര്യയും മക്കളും അപകടത്തില്‍ പെട്ട് സീരിയസായി ആശുപത്രിയില്‍ കിടക്കുകയാണ് എന്നറിയിക്കാന്‍. ഒരുപോള കണ്ണടയ്ക്കാതെ, വിങ്ങുന്ന മനസുമായി അയാളാ രാത്രി കഴിച്ചുകൂട്ടി. പിറ്റേന്ന്, തിരിച്ചുപോകാനായി, കരഞ്ഞുകലങ്ങിയ കണ്ണുകളും വിറയ്ക്കുന്ന കാലടികളും ക്ഷീണിച്ച ശരീരവുമായി എയര്‍പോര്‍ട്ടിലെത്തിയ യുവാവിനെ വിമാനത്താവള ഉദ്യോഗസ്ഥര്‍ കണക്കറ്റു കളിയാക്കി. അപമാനിച്ചു. കാരണമറിഞ്ഞ ആ യുവാവ് എല്ലാം മറന്ന് പൊട്ടിത്തെറിച്ചുപോയി. കണ്ണുകള്‍ ചുവന്നു കലങ്ങിയിരിക്കുന്നതും ക്ഷീണിതശരീരവും കണക്കില്‍ കൂടുതല്‍ മദ്യം അകത്തു ചെന്നതിന്റെ ലക്ഷണമാണത്രെ.....!! എയര്‍പോര്‍ട്ടും ഇവിടെ വന്നിറങ്ങുന്ന വിമാനങ്ങളും നിന്റെയൊന്നും അപ്പന്‍ സമ്പാദിച്ചതല്ല എന്നു പറഞ്ഞ് പൊട്ടിത്തെറിച്ച ആ യുവാവിനെ പോലീസ് അറസ്റ്റുചെയ്യാതിരുന്നത് യാത്രക്കാരുടെ സമയോജിതമായ ഇടപെടല്‍ കൊണ്ടു മാത്രം. മനു മോന്‍ ഫേയ്‌സ്ബുക്കില്‍ കുറിച്ചിട്ട വരികള്‍......


'നിന്റെയൊക്കെ അപ്പന്‍ സമ്പാദിച്ച വകയാണോടാ ഈ എയര്‍പോര്‍ട്ടും ഇവിടെ വന്നിറങ്ങുന്ന ഫ്‌ളൈറ്റുകളും.... ' സാമിന്റെ ഉച്ചത്തിലുള്ള അലര്‍ച്ച കേട്ട് ഞാനടക്കം മറ്റുള്ള യാത്രക്കാരെല്ലാം കാര്യമെന്താണെന്നറിയാതെ സാമിനെ പകച്ചു നോക്കി. ഇമിഗ്രേഷന്‍ ഉദ്യോഗസ്ഥര്‍ക്കു നേരെയാണ് സാമിത് പറഞ്ഞതെന്ന് മനസ്സിലായപ്പോഴേക്കും പോലീസ് ഉദ്യോഗസ്ഥര്‍ അവനടുത്ത് എത്തിയിരുന്നു. പിടിച്ചു തള്ളി അവരവിടെ നിന്നും സാമിനെ കൊണ്ടു പോകാന്‍ ശ്രമിച്ചപ്പോഴാണ് ഞങ്ങള്‍ യാത്രക്കാര്‍ ഇടപെട്ടത്. കാര്യമെന്താണെന്നറിയാതെ സാമിനെ കൊണ്ടു പോകാന്‍ പറ്റില്ലെന്ന് ഞങ്ങള്‍ പറഞ്ഞപ്പോള്‍, ആദ്യം അവര്‍ എതിര്‍ത്തെങ്കിലും ഞങ്ങള്‍ യാത്രക്കാര്‍ ഒറ്റക്കെട്ടാണെന്നും പ്രശ്‌നം രൂക്ഷമാകുമെന്നും അവര്‍ക്ക് മനസ്സിലായപ്പോഴാണ് സാമിനെ ഞങ്ങളോട് സംസാരിക്കാന്‍ അവര്‍ അനുവദിച്ചത്.

'തോളില്‍ തട്ടി സാരമില്ല, വിഷമിക്കണ്ട' കാര്യമെന്താണെന്നു പറ. ഞങ്ങളുണ്ട് കൂടെ എന്ന് പറഞ്ഞപ്പോള്‍ സാമിന്റെ കണ്ണുകള്‍ നിറഞ്ഞൊഴുകി. 'ഞാന്‍, എന്റെ അപ്പച്ചന് സുഖമില്ലാതെ ഹോസ്പിറ്റലില്‍ അഡ്മിറ്റാണെന്നറിഞ്ഞ് ഒരാഴ്ച മുന്‍പ് നാട്ടില്‍ വന്നതാ. അപ്പച്ചന് അസുഖം ഭേദമായി പക്ഷേ ദുബായില്‍ നിന്നും എനിക്ക് ഇന്നലെ വന്ന എന്റെ സുഹൃത്തിന്റെ കാള്‍, എന്റെ ഭാര്യയും രണ്ട് മക്കളും അവിടെ വെച്ചുണ്ടായ കാറപകടത്തില്‍ പരിക്ക് പറ്റി ഹോസ്പിറ്റലില്‍ ആണെന്നാണ്. അല്പം സീരിയസാണെന്നാണ് എന്നോടവന്‍ പറഞ്ഞതു. നിങ്ങള്‍ക്കറിയാമോ ഇന്നലെ രാത്രി ഞാന്‍ ഉറങ്ങിയിട്ടില്ല. പാസ്‌പോര്‍ട്ടുമായി ഇമിഗ്രേഷന്‍ ഉദ്യോഗസ്ഥരുടെ മുന്‍പില്‍ ചെന്നപ്പോള്‍ അപമാനിക്കുകയും കളിയാക്കുകയും ചെയ്യുന്ന രീതിയിലുള്ള പെരുമാറ്റം ആയിരുന്നു. കാര്യമെന്താണെന്ന് എനിക്കപ്പോള്‍ മനസ്സിലായിരുന്നില്ല.

അങ്ങോട്ട് മാറി നില്ക്ക്, കുറച്ചു സമയം കഴിഞ്ഞ് വിളിക്കാം എന്ന് എന്നോട് അവര്‍ പറഞ്ഞു. എന്റെ ക്ഷീണം കാരണം ഞാനിവിടുള്ള കസേരയില്‍ വന്നിരുന്നു. അപ്പോഴാണ് അവര്‍ പരസ്പരം എന്നെ അപമാനിക്കുന്ന രീതിയില്‍ ഓരോന്ന് പറയുന്നത് ഞാന്‍ കേട്ടത്. ഞാന്‍ മദ്യം കഴിച്ചു ഓവറായിട്ടാണത്രേ, എന്റെ കണ്ണുകള്‍ ചുവന്നിരിക്കുന്നതും, എന്റെ ശരീരത്തിന് ഇത്രയും ക്ഷീണം തോന്നിക്കുകയും ചെയ്യുന്നതെന്നും ഞാനാ ഫ്‌ളൈറ്റില്‍ യാത്ര ചെയ്താല്‍ സ്ത്രീകളെ അപമാനിക്കാന്‍ ശ്രമിക്കുകയും ചെയ്യുമത്രേ. എന്റെ കരഞ്ഞു കലങ്ങിയ കണ്ണുകള്‍ മദ്യപാനം നിമിത്തമാണെന്ന് പറഞ്ഞാല്‍ ഞാന്‍ സ്ത്രീകളെ അപമാനിക്കാന്‍ ശ്രമിക്കുമെന്ന് പറഞ്ഞാല്‍.

നിങ്ങള്‍ പറയൂ, ഞാനിങ്ങനയല്ലാതെ എങ്ങനെ പ്രതികരിക്കണം. സഹിക്കുന്നതിനും ഒരു പരിധി ഇല്ലേ. എന്റെ കുടുംബത്തിന്റെ അവസ്ഥ ഓര്‍ത്ത് ഞാന്‍ ഒന്നാമതേ മാനസിക നില തെറ്റിയിരിക്കുവാ. ഇതും കൂടി ആയപ്പോള്‍ എന്റെ നിയന്ത്രണം എനിക്ക് നഷ്ടപ്പെട്ടു. അതാ ഞാന്‍ ഇങ്ങനെയൊക്കെ പറഞ്ഞു പോയത്. നീയൊക്കെ അഴിയെണ്ണണമെടാ. ജയിലില്‍ കിടക്കുമ്പഴേ അറിയൂ ഞങ്ങളോട് കളിക്കാന്‍ ശ്രമിച്ചാല്‍ എങ്ങനെയിരിക്കുമെന്ന്. കൂട്ടത്തില്‍ ഒരു ഉദ്യോഗസ്ഥന്‍ ഇതും പറഞ്ഞ് സാമിനു നേരെ കൈ ഉയര്‍ത്താന്‍ ശ്രമിച്ചപ്പോഴാണ് ഞങ്ങള്‍ യാത്രക്കാരില്‍ ഒരാളായ അനന്തന്‍ കേറി ഇടപെട്ടത്..

പിന്നീടങ്ങോട്ട് അനന്തന്‍ പറഞ്ഞ ഓരോ വാക്കുകളും പ്രവാസികളുടെ മേല്‍ എയര്‍പോര്‍ട്ട് ഉദ്യോഗസ്ഥര്‍ കാണിക്കുന്ന ധാര്‍ഷ്ട്യത്തിന്റെ നീറുന്ന യാഥാര്‍ത്ഥ്യങ്ങളായിരുന്നു.

'നീ ഒക്കെ മാസാമാസം എണ്ണി വാങ്ങുന്ന ശമ്പളം ഞങ്ങള്‍ പ്രവാസികളുടെ വിയര്‍പ്പിന്റെ വിലയാ. ഓരോ പ്രവാസികളും ഈ എയര്‍പോര്‍ട്ടിനുള്ളില്‍ എത്തി ചേരുന്നത് പലപല പ്രശ്‌നങ്ങളുമായാണ്. ഉറ്റവരെ പിരിയുന്ന വേദനയും മരണവാര്‍ത്ത അറിഞ്ഞെത്തുന്നവരും, പലവിധ മാരക അസുഖങ്ങളും. അങ്ങനെയങ്ങനെ നിരവധി പ്രശ്‌നങ്ങളാണ് ഓരോ പ്രവാസികളുടെയും മനസ്സിനകത്ത്. നിങ്ങള്‍ ഉദ്യോഗസ്ഥര്‍ ഞങ്ങള്‍ യാത്രക്കാരെ ചായയും കാപ്പിയും തന്നൊന്നും സല്ക്കരിക്കാന്‍ ഞങ്ങള്‍ ആവശ്യപ്പെടുന്നില്ല. പക്ഷെ, നിങ്ങളുടെ മുഖത്തുള്ള ഒരു ചെറു പുഞ്ചിരി, അത്രയെങ്കിലും ചെയ്തൂടെ ഞങ്ങള്‍ പ്രവാസികളുടെയടുത്ത്. പകരം നിങ്ങള്‍ ഞങ്ങളെ പുച്ഛത്തോടെയല്ലാതെ നോക്കിയിട്ടുണ്ടോ.

ഓരോ പ്രവാസിയേയും ഒരു തീവ്രവാദിയുടെ ഭാവത്തോടെയല്ലാതെ നിങ്ങള്‍ പരിഗണിക്കാതിരിക്കുന്നുണ്ടോ, മരുഭൂമിയില്‍ കഷ്ടപ്പെട്ട് ഞങ്ങളുണ്ടാക്കിയ പണം കൊടുത്ത് ഞങ്ങള്‍ വാങ്ങുന്ന തുച്ഛമായ സാധനങ്ങള്‍ക്കു പോലും അതിന്റെ വിലയേക്കാള്‍ ഇരട്ടി നിങ്ങള്‍ നികുതിയായി ആവശ്യപ്പെട്ടപ്പോഴും ഞങ്ങള്‍ പ്രവാസികള്‍ പ്രതികരിക്കാതിരിക്കുന്നത് ഞങ്ങള്‍ക്ക് അതിനുള്ള കഴിവില്ലാഞ്ഞിട്ടല്ല, മറിച്ച് ഞങ്ങളിലൂടെ സ്വന്തം നാട് വികസിക്കുന്നെങ്കില്‍ അങ്ങനെയാകട്ടേ എന്ന് വിചാരിച്ചു മാത്രമാണ്.

അന്യ രാജ്യങ്ങളിലെ എയര്‍പോര്‍ട്ടില്‍ യാത്രക്കാരോട് അവിടുത്തെ ഉദ്യോഗസ്ഥര്‍ പെരുമാറുന്നത് നിങ്ങളൊന്ന് കണ്ടു പഠിക്കണം. അര്‍ക്ക് ഓരോ യാത്രക്കാരും അവരെ സംബന്ധിച്ചിടത്തോളം അതിഥികളാണ്, പക്ഷേ ഇവിടെ നിങ്ങള്‍ക്ക് ഞങ്ങളെ പുച്ഛമാണ്. പ്രായമായ സ്ത്രീകളോടും കുട്ടികളോട് പോലും നിങ്ങളില്‍ പല ഉദ്യോഗസ്ഥരും മാന്യതയില്ലാതെ തന്നെ വേദനിപ്പിക്കുന്ന വാക്കുകളാണ് പറയുന്നത്. കഷ്ടപ്പെട്ട് ഞങ്ങള്‍ പ്രിയപ്പെട്ടവര്‍ക്കായി വാങ്ങി വന്ന സാധനങ്ങള്‍ വെറും ചവര്‍ എറിയുന്ന ലാഘവത്തോടെ നിങ്ങള്‍ വലിച്ചെറിയുന്നത് കാണുമ്പോള്‍ ഞങ്ങള്‍ അനുഭവിക്കുന്ന വേദന നിങ്ങള്‍ക്കും മനസ്സിലാകണമെങ്കില്‍ ഒരിക്കലെങ്കിലും പ്രവാസിയാകണം. സാമിനെ ഞങ്ങള്‍ക്കൊപ്പം യാത്ര ചെയ്യാന്‍ അനുവദിച്ചില്ലെങ്കില്‍ ഞങ്ങള്‍ പ്രവാസികള്‍ ആരെന്ന് നിങ്ങള്‍ അറിയും. ഒരു പ്രശ്‌നം വന്നാല്‍ ഞങ്ങളെല്ലാം ഒരു മനസ്സായി തന്നെ നില്‍ക്കും'.

'അനന്തന്‍ പറഞ്ഞു നിര്‍ത്തിയതും കൂട്ടത്തില്‍ അല്പം മാന്യതയുള്ള ഒന്ന് രണ്ട് നല്ല ഉദ്യോഗസ്ഥര്‍ സാമിനോട് മറ്റുള്ളവര്‍ പറഞ്ഞ പരിഹാസ വാക്കുകള്‍ക്ക് ക്ഷമ ചോദിക്കുകയും അയാളുടെ ദുര്‍വിധിയില്‍ ആശ്വസിപ്പിക്കുകയും യാത്രയുടെ പരിശോധനകളെല്ലാം വേഗത്തില്‍ തന്നെ ശരിയാക്കുകയും ചെയ്തു'.

തക്ക സമയത്ത് നിങ്ങള്‍ യാത്രക്കാര്‍ ഇടപെട്ടില്ലായിരുന്നെങ്കില്‍ എനിക്ക് ജയിലില്‍ കിടക്കേണ്ടി വന്നേനെ, ഒരുപാട് നന്ദിയുണ്ട് നിങ്ങളോടെനിക്ക്. സാം കൈകൂപ്പി കണ്ണു നീരോടെ ഇത് പറഞ്ഞപ്പോള്‍ അറിയാതെ ഞങ്ങളുടെ മിഴിയും നിറഞ്ഞു. മറ്റുള്ളവരുടെ നൊമ്പരങ്ങള്‍ പ്രവാസിയോളം മനസ്സിലാക്കാന്‍ കഴിയുന്നവര്‍ വിരളമാണ്. വന്ദിച്ചില്ലേലും നിന്ദിക്കരുത്. ഓരോ പ്രവാസികളേയും. നീറുന്ന മനസ്സുകളുടെ ഒരു സംഗമ വേദിയാണ് പ്രവാസിയെ സംബന്ധിച്ചിടത്തോളം ഓരോ എയര്‍പോര്‍ട്ടുകളും. വിയര്‍പ്പ് അന്നമാക്കുന്നവര്‍. അതാണ് ഓരോ പ്രവാസികളും.

Share:

Monday, 24 July 2017

പൂച്ചയ്ക്കു മുന്നില്‍ ഉണക്കമീന്‍ വച്ചിട്ട് ദൈവം ഒറ്റ കല്പന....




പൂച്ചയ്ക്കു മുന്നില്‍ ഉണക്കമീന്‍ വച്ചിട്ട് ദൈവം കല്‍പിച്ചു, 'തിന്നരുത് പൂച്ചേ, തിന്നരുത്, തിന്നാല്‍ നിന്നെ ശപിച്ചു കളയും' എന്ന്.... മീന്‍ തിന്നാതിരിക്കാന്‍ പൂച്ച പരമാവധി പരിശ്രമിച്ചു, പക്ഷേ, ഇതിന്റെ മണവും സഹിച്ച് എങ്ങനെ പിടിച്ചു നില്‍ക്കും...? നാടു വിട്ടു പോകാമെന്നു കരുതിയാല്‍, പറുദീസ മാത്രമേ ഭൂമിയില്‍ ഉള്ളു താനും. അപ്പോഴാണ് പാമ്പിന്റെ പ്രലോഭനം... പിന്നെ സഹിക്കാന്‍ കഴിഞ്ഞില്ല... സംഗതി ശുഭം.


ഉണക്ക മീനിനു കാവലിരുന്ന പൂച്ചയുടെ അവസ്ഥ തന്നെയായിരുന്നു ആദിമ (ഇപ്പോഴത്തെയും) മനുഷ്യരായ ആദത്തിനും ഹവ്വായ്ക്കും. പരിപൂര്‍ണ്ണ നഗ്നരായി ഒരു പുരുഷനും സ്ത്രീയും. വെടിമരുന്നും തീയും ഒരിടത്തു വച്ചിട്ട് കത്തരുതെന്നു കല്‍പ്പിച്ചാല്‍ എങ്ങനെ ശരിയാകും....? സൃഷ്ടികര്‍മ്മം നടത്തിയ ദൈവം വസ്ത്രം ധരിച്ചിരുന്നു. ദൈവം നഗ്നനായിരുന്നില്ല. പക്ഷേ, സൃഷ്ടിച്ചു വച്ച രണ്ടു മനുഷ്യര്‍ക്കും വസ്ത്രമേതുമേ നല്‍കിയില്ല.....!! എന്തൊരു ക്രൂരത....!!!!

എന്തായാലും സംഗതി കൈവിട്ടു പോയി. ദൈവം രണ്ടിനെയും ശപിക്കുകയും ചെയ്തു. ഏദന്‍തോട്ടത്തില്‍ നിന്നും പുറത്തായി. ദൈവത്തിന്റെ ഭാഷയില്‍ പാപഫലമായി കായേന്‍ പിറന്നു. നല്ലവനായ അനുജന്‍ ആബേലിന്റെ കൊലയാളിയുമായി. പക്ഷേ, അതേ ശാരീരിക പ്രക്രിയയിലൂടെ തന്നെയല്ലേ ആബേലും ജനിച്ചത്...? അപ്പോള്‍ കായേന്‍ ദുഷ്ടനും ആബേല്‍ നല്ലവനും ആയത് എങ്ങനെ...? അതെങ്ങനെ സംഭവിച്ചു....?

ക്രിസ്ത്യനിക്കു ജനിക്കുന്ന ഓരോ കുഞ്ഞിനും ഉത്ഭവപാപമുണ്ട് എന്നവര്‍ വിശ്വസിക്കുന്നു. എന്താണാ ഉത്ഭവപാപം...? സ്ത്രീയും പുരുഷനും തമ്മില്‍ ശരീരം പങ്കിടുമ്പോള്‍ അതിന്റെ ഉപോത്പന്നമായി ഉണ്ടാകുന്ന ഒന്നാണ് ഓരോ ശിശുക്കളും. അതായത്, ശാരീരിക ബന്ധം പാപമാണ് എന്ന് പറഞ്ഞും പഠിച്ചും വളരുന്നവരാണ് ഓരോ ക്രിസ്ത്യാനിയും. അപ്പോള്‍ ആ ബന്ധത്തിലൂടെ ജനിക്കുന്ന കുഞ്ഞ് പാപത്തില്‍ ജനിച്ചവനാണ്. ഉത്ഭവപാപം കഴുകിക്കളയാനും ക്രിസ്ത്യാനിയാവാനുമാണ് പിഞ്ചുകുഞ്ഞുങ്ങളുടെ തലയില്‍ വെള്ളമൊഴിച്ച് മാമ്മോദീസ മുക്കി ശുദ്ധീകരിച്ചെടുക്കുന്നത്. പിന്നീട് ആദ്യകുര്‍ബ്ബാന കൂടി സ്വീകരിച്ചു കഴിഞ്ഞാല്‍ പിന്നെ ആഴ്ചയില്‍ ആഴ്ചയില്‍ ചെയ്യുന്ന പാപങ്ങള്‍ ആഴ്ചയില്‍ ആഴ്ചയില്‍ പുരോഹിതനെ പറഞ്ഞു കേള്‍പ്പിച്ചു വീണ്ടും വീണ്ടും ആ പാപങ്ങള്‍ തന്നെ ചെയ്യാം. ഈ പാപങ്ങള്‍ തന്നെയല്ലേടോ താന്‍ കഴിഞ്ഞ ആഴ്ചയില്‍ ചെയ്തത് എന്ന് ഒരാളും ചോദിക്കില്ല. അല്ലെങ്കിലും പരമകാരുണികനായ ദൈവം അതെല്ലാം ക്ഷമിക്കും....

ശാരീരിക ബന്ധത്തിലൂടെയല്ലാതെ കുട്ടികളെ ജനിപ്പിക്കാനുള്ള എളുപ്പവും ചെലവു കുറഞ്ഞതുമായ മറ്റൊരു മാര്‍ഗ്ഗവും ദൈവം മനുഷ്യനു നല്‍കിയതുമില്ല. ശാരീരിക ബന്ധം പാപം, വംശം നിലനിര്‍ത്താന്‍ കുട്ടികളെ ജനിപ്പിക്കുകയും വേണം.... ഇതെന്തൊരു ഏര്‍പ്പാട് എന്റെ ദൈവമേ....!!!


വ്യഭിചാരം....


നിയമത്തില്‍ കൂടിയുള്ള ശാരീരക ബന്ധം പോലും നിഷിദ്ധമായ നാട്ടില്‍, വ്യഭിചാരം കൊടിയ പാപം തന്നെ. അവളൊരു ഡ്രൈവിംഗ് സ്‌കൂള്‍ ആണെന്നും ഡ്രൈവിംഗ് പഠിച്ച വണ്ടി ആരും പണം കൊടുത്തു വാങ്ങുകയില്ലെന്നും പറയുന്നതിലെ ക്രൂരമായ തമാശ ആരും മനസിലാക്കുന്നില്ല. ഡ്രൈവിംഗ് പഠിച്ച മഹാന്മാര്‍ എല്ലാം മാന്യന്മാര്‍. വണ്ടി മാത്രം മോശം....

സ്ത്രീയുടെ ചാരിത്ര്യത്തെ ചോദ്യം ചെയ്യാത്ത ഒരു തെറിവാക്കു പോലും മലയാള ഭാഷയിലില്ല. അത് 'തന്തയ്ക്കു പിറക്കാത്തവന്‍' എന്നായാലും കൊള്ളുന്നത് തള്ളയുടെ നെഞ്ചത്താണ്. പൊത്തിപ്പൊതിഞ്ഞു വയ്ക്കുന്ന ഈ ചാരിത്ര്യം തന്നെയാണ് ഹേ കപട സദാചാര വാദികളെ നിങ്ങളുടെ ശാപം.....


പ്രണയം.....എത്രയോ മനോഹരമാണ്....


എത്രയോ മനോഹരമാണ് പ്രണയം....!! പ്രണയം ഉള്ളില്‍ സൂക്ഷിക്കുന്നവരെല്ലാം കാമത്തിനു വേണ്ടി കാത്തിരിക്കുന്നു എന്ന നിലപാടാണ് മലയാളിക്ക്. അതുകൊണ്ടുതന്നെയാണ് ഏതെങ്കിലും ഒരു സ്ത്രീയും പുരുഷനും സംസാരിച്ചാല്‍ ഉടന്‍ ആകാശം ഇടിഞ്ഞുവീണതു പോലെ പലരും പെരുമാറുന്നത്. പ്രണയിക്കുന്ന മനസുകളെ തമ്മില്‍ അകറ്റാന്‍ പരക്കം പായുന്നത്... പ്രണയം ഇല്ലാതെയാക്കാന്‍ കൊല്ലാന്‍ പോലും മടിയില്ലാത്തത്....


പക്ഷേ....മനുഷ്യരുടെ സന്തോഷത്തിനും സമാധാനത്തിനും വേണ്ടി, മനുഷ്യന്‍ തന്നെ സൃഷ്ടിച്ചെടുത്ത ദൈവസങ്കല്പങ്ങള്‍ തന്നെയാണ് മനുഷ്യരുടെ സന്തോഷകരമായ ജീവിതത്തിന്റെ വിലങ്ങുതടികള്‍....

എന്തിനീ അനാവശ്യ ചാരിത്ര്യ പ്രസംഗങ്ങള്‍........ ഉണക്കമീന്‍ ഒന്നുനക്കാന്‍ പോലും കിട്ടാത്ത പൂച്ചയുടെ മൂളലും മുരളലും പ്രത്യാക്രമണങ്ങളും ഒന്നു കാണേണ്ടതു തന്നെ.... വികാരങ്ങളെ അടക്കിപ്പിടിച്ച മനുഷ്യരും അങ്ങനെ തന്നെ... ഞാന്‍ അനുഭവിക്കുന്നില്ല, മറ്റുള്ളവനെ അനുഭവിപ്പിക്കാന്‍ അനുവദിക്കുകയുമില്ല....


നിറുത്തൂ, പിഴച്ചവരെന്ന ആക്രോശം....


പ്രണയം ശരീരത്തിന്റെ സ്വോഭാവികമായ ഒരാവശ്യമാണെന്നും അത് അടിച്ചമര്‍ത്തുകയല്ല, മറിച്ച് അനര്‍ഗ്ഗളം ഒഴുകാന്‍ അനുവദിക്കുകയാണു വേണ്ടതെന്നും കരുതിയാല്‍, കേരളത്തിലെ പകുതിയിലേറെ പ്രശ്‌നങ്ങള്‍ക്കു പരിഹാരമാകും. ഒളിച്ചും പാത്തും സ്ത്രീകള്‍ തുണിമാറുന്നതും പ്രാഥമിക കൃത്യങ്ങള്‍ നിര്‍വ്വഹിക്കുന്നതും ഒന്നും ആരും എത്തിനോക്കുകയില്ല. അത് പകര്‍ത്തി പ്രചരിപ്പിക്കാന്‍ ശ്രമിക്കുകയില്ല. കാണരുത്, അനുഭവിക്കരുത് എന്നെല്ലാം പറയുന്നത് ഏതു വിധേനയും ലംഘിക്കുക എന്നത് മനുഷ്യന്റെ സഹജ സ്വഭാവമായി മാറിക്കഴിഞ്ഞു.

പരപുരുഷ ബന്ധം കൊടിയ പാപമെന്നു പറഞ്ഞും പഠിച്ചും വളരുന്ന ഒരു നാട്ടില്‍, കുടുംബത്തിന്റെ മാനം സ്ത്രീയുടെ തുണിക്കകത്ത് സൂക്ഷിക്കുന്ന ഒരു നാട്ടില്‍, എം വിന്‍സന്റ് എം എല്‍ എ കുറ്റവാളിയാണ്. ഒന്നര വര്‍ഷമായി അനുഭവിച്ചു പോരുന്ന ഒരു ബന്ധം. അതു തുടരാന്‍ ഏതെങ്കിലും ഒരു പാര്‍ട്ടി തീരുമാനിച്ചാല്‍, അത് അവിടെ അവസാനിപ്പിക്കേണ്ടതിനു പകരം, കയറിപ്പിടിച്ച് തന്റേടം കാണിക്കുന്നവര്‍ ക്രിമിനല്‍ തന്നെ. സ്വന്തംഭര്‍ത്താവല്ലാതെ, മറ്റൊരു പുരുഷനെ സ്‌നേഹിക്കാന്‍ ഈ എം എല്‍ എ സ്വന്തം ഭാര്യയെ അനുവദിക്കുമോ...? ഒരിക്കലുമില്ല, കാരണം മാനം കാക്കുക എന്നത് സ്ത്രീയുടെ മാത്രം ഉത്തരവാദിത്വമാണല്ലോ.....


തട്ടുകേടു പറ്റിയാല്‍ പറയാം, എനിക്കു കൂട്ടായി തന്ന ഈ സ്ത്രീയാണ് എന്നെ വഴിതെറ്റിച്ചത് എന്ന്...എന്നെ ഇതിലേക്കു വലിച്ചിഴച്ചത് എന്ന്......

സ്ത്രീയെ പഴച്ചവരെന്നു വിളിക്കുന്നവര്‍ ആലോചിക്കുക.... അവളെ വ്യഭിചാരിയെന്നു വിളിക്കുന്നവര്‍ കരുതിയിരിക്കുക.... നിങ്ങളുടെ ആ വാക്കുകളാണ് നിങ്ങളെ തിരിഞ്ഞുകൊത്തുന്നത്....

പുരുഷന് ജീവിതത്തില്‍ കൂട്ടായി, പരപുരുഷ സ്പര്‍ശമേല്‍ക്കാത്ത സ്ത്രീ തന്നെ വേണം. ആണിനാണെങ്കില്‍ എത്രവേണമെങ്കിലും മറുകണ്ടം ചാടാം, പ്രശ്‌നമില്ല.... അപ്പോള്‍, സ്വന്തം അഭിമാനം സംരക്ഷിക്കാന്‍ അവളുമൊന്നു ശ്രമിക്കില്ലേ.... വരുന്നവന്റെ സുന മുറിച്ചിട്ടോ കോടതി കേറ്റിയിട്ടോ എന്തായാലും.....!!


അതികഠിനമായ ചാരിത്ര്യ നിഷ്ഠയാണ് ഇന്ത്യയുടെ ശാപം, ഇന്ത്യന്‍ ജനത സ്വന്തം അഭിമാനവും അന്തസും സ്ത്രീയുടെ തുടയിടുക്കില്‍ നിന്നും മാറ്റി പ്രതിഷ്ഠിക്കേണ്ടിയിരിക്കുന്നു. പ്രണയം
കൊലപാതകത്തേക്കാള്‍ മാരകമായ പാപമാണെന്നു വിശ്വസിക്കുന്ന സമൂഹത്തോട് വേദമോദിയിട്ട് എന്തുകാര്യം.....?
Share:

Wednesday, 12 July 2017

ഒന്നുകില്‍ അതിനു പിന്നില്‍ ദിലീപാകില്ല, അല്ലെങ്കില്‍ കാരണം അതാകില്ല





നടന്‍ ദിലീപിന്റെ നിലപാടുകളെ എന്നെന്നും വിമര്‍ശിച്ചിട്ടുള്ള ഒരു വ്യക്തിയാണു ഞാന്‍. പക്ഷേ, ദിലീപിന്റെ അറസ്റ്റിലേക്കു നയിച്ചതെന്നു കരുതുന്ന തെളിവുകള്‍ പരിശോധിക്കുമ്പോള്‍, ചില കാര്യങ്ങള്‍ ദഹിക്കാതെ കിടക്കുന്നു. പോലീസ് നടത്തിയത് അത്യന്തം അഭിനന്ദനമര്‍ഹിക്കുന്ന കാര്യങ്ങളാണ്. പ്രശസ്തിയുടെ അത്യുന്നതിയില്‍ നില്‍ക്കുന്ന, പ്രമുഖനായ ഒരു നടനെ അറസ്റ്റുചെയ്യണമെങ്കില്‍, അതിനു പിന്നില്‍ ചങ്കുറപ്പുള്ള കുറെ വ്യക്തികളുടെ (പോലീസ് ഉള്‍പ്പടെ) ഇടപെടലുകള്‍ തന്നെയാണ്. അതില്‍ ഏറ്റവും മുമ്പന്തിയില്‍ നില്‍ക്കുന്നത്, ആക്രമണത്തിന് ഇരയായ നടിയുടെ കരളുറപ്പാണ്. അവള്‍ കാണിച്ച ആ ധൈര്യമില്ലായിരുന്നുവെങ്കില്‍ ഈ കേസ് ഒരിക്കലും തെളിയില്ലായിരുന്നു. കേസിന്റെ മുന്നോട്ടുള്ള നടത്തിപ്പിലും ആ ചങ്കുറപ്പ് അവള്‍ കാണിക്കട്ടെ. ഒപ്പം മുഖ്യമന്ത്രി പിണറായി വിജയനും അഭിന്ദനം അര്‍ഹിക്കുന്നു.

പക്ഷേ, അപ്പോഴും ചില കാര്യങ്ങള്‍ മനസില്‍ ദഹിക്കാതെ കിടക്കുന്നു. നടിയെ ആക്രമിക്കാന്‍ കാരണമായി പോലീസ് പറയുന്ന കാരണത്തിന്റെ ദുര്‍ബലതയാണ് ആദ്യം മനസിലേക്കെത്തുന്നത്. നടിയെ ഇത്തരത്തില്‍ ആക്രമിച്ചതുകൊണ്ട് ദിലീപിനുള്ള നേട്ടമെന്ത്?

ദിലീപും കാവ്യാമാധവനും തമ്മിലുള്ള പ്രണയവും സ്വകാര്യനിമിഷങ്ങളും മുന്‍ഭാര്യ മഞ്ജു വാര്യരോട് ആക്രമണത്തിനിരയായ നടി വെളിപ്പെടുത്തി എന്നതാണ് ഇത്തരത്തില്‍ മൃഗീയമായ ഒരു ക്വട്ടേഷനു പിന്നിലെ ലക്ഷ്യമെന്ന് പോലീസ് വെളിപ്പെടുത്തുന്നു. ക്വട്ടേഷന് വര്‍ഷങ്ങളുടെ പഴക്കമുണ്ട് എന്നാണ് പോലീസ് പറയുന്നത്. ഇരയെ ആക്രമിക്കുവാന്‍ 2013 മുതല്‍ പള്‍സര്‍ സുനി ലക്ഷ്യമിട്ടിരിക്കുകയായിരുന്നുവെന്നും പറയുന്നുണ്ട്. സന്ദര്‍ഭം ഒത്തുകിട്ടിയത് ഇപ്പോഴാണെന്നു മാത്രം.

പക്ഷേ, ഒത്തുവന്ന ആ സന്ദര്‍ഭത്തില്‍ തന്നെയാണ് യഥാര്‍ത്ഥ പ്രശ്‌നം. ഏതാനും മാസങ്ങളെ ആയിട്ടുള്ളു കാവ്യയും ദിലീപുമായുള്ള വിവാഹം നടന്നിട്ട്. വര്‍ഷങ്ങളായി പ്രണയം മനസില്‍ കൊണ്ടുനടന്ന വ്യക്തികള്‍. ഒന്നായിത്തീരണമെന്ന് അതിയായി ആഗ്രഹിച്ച രണ്ടു വ്യക്തികള്‍. കാവ്യയുടെ മുന്‍ഭര്‍ത്താവിന്റെയും കുടുംബാംഗങ്ങളുടേയും മൊഴികള്‍ വിശ്വസിച്ചാല്‍, ആ ബന്ധം തകരാനുള്ള കാരണം പോലും കാവ്യയും ദിലീപുമായുള്ള പ്രണയമാണ്. വീട്ടുകാര്‍ നിശ്ചയിച്ച് നടത്തിക്കൊടുത്ത വിവാഹം വേണ്ടെന്നു വച്ച് തിരിച്ചുവന്നവളാണ് കാവ്യ. ഒടുവില്‍, എല്ലാ പ്രതിബന്ധങ്ങളെയും തരണം ചെയ്ത് അവര്‍ ഒന്നായി. അവര്‍ അത്രയേറെ സ്‌നേഹിച്ചിരുന്നുവെങ്കില്‍, ഒരുമിച്ചുള്ള ഈ ജീവിതത്തിനു നന്ദിപറയേണ്ടത് ആക്രമണത്തിന് ഇരയായ ഈ നടിയോടു തന്നെയല്ലേ? അവളല്ലേ അവരുടെ ഈ ഒത്തുചേരല്‍ വേഗത്തിലാക്കിയത്..? അവളല്ലേ മഞ്ജുവാര്യരുമായുള്ള ദിലീപിന്റെ വേര്‍പിരിയല്‍ സാധ്യമാക്കിയത്...? അങ്ങനെയെങ്കില്‍, വര്‍ഷങ്ങളായി ആഗ്രഹിച്ച ഒരു ജീവിതം സ്വന്തമാക്കാന്‍ സഹായിച്ചതിന് ആ നടിയോട് ദിലീപിന് നന്ദിയല്ലേ ഉണ്ടാവുക...? ഇത്തരത്തില്‍ ക്രൂരമായി അവളെ ഉപദ്രവിക്കുമോ....?

ഇനി മഞ്ജുവാര്യരുമായുള്ള വേര്‍പിരിയല്‍ ദിലീപ് യഥാര്‍ത്ഥത്തില്‍ ആഗ്രഹിച്ചില്ല എങ്കില്‍, മഞ്ജുവിനെ അപ്പോഴും ദിലീപ് സ്‌നേഹിക്കുന്നുണ്ടെന്നല്ലേ അര്‍ത്ഥം? അപ്പോള്‍, താന്‍ സ്‌നേഹിക്കുന്ന, തന്റെ ഒപ്പം നീണ്ട പതിനാലു വര്‍ഷം ജീവിച്ച, തന്റെ മകളുടെ അമ്മയായ ആ സ്ത്രീയുടെ അഭിനയജീവിതവും അതിലൂടെ അവളുടെ സാമ്പത്തിക സ്രോതസും ഇല്ലാതാക്കാന്‍ ദിലീപ് ശ്രമിക്കുമോ...?

പുറത്തുവരുന്ന വാര്‍ത്തകള്‍ ശരിയാണെങ്കില്‍, മഞ്ജുവാര്യരുടെ അഭിനയജീവിതം തടയാന്‍ പല്ലും നഖവുമുപയോഗിച്ച് ശ്രമിച്ചവനാണു ദിലീപ്. അങ്ങനെയാണെങ്കില്‍, മഞ്ജുവിനെ അംഗീകരിക്കാനോ മഞ്ജുവുമൊത്ത് തുടര്‍ന്നു ജീവിക്കാനോ ആ നടന്‍ തയ്യാറല്ലായിരുന്നു എന്നുവേണം കരുതാന്‍. അങ്ങനെ വരുമ്പോള്‍, കാവ്യമാധവനുമൊത്തുള്ള ഒരു ജീവിതം ദിലീപ് അതിയായി ആഗ്രഹിച്ചിരുന്നു എന്നും കരുതേണ്ടിയിരിക്കുന്നു. അങ്ങനെയെങ്കില്‍, അക്കാര്യം വേഗത്തിലാക്കിയ നടിയോട് ദിലീപ് എന്തിന് മനസില്‍ പകസൂക്ഷിക്കണം...?


ആക്രമിക്കാനുള്ള കാരണം അതുമാത്രമാണ് എങ്കില്‍, മഞ്ജുവാര്യരെ ഭാര്യയായും കാവ്യമാധവനെ കാമുകിയായും മാത്രം നിലനിര്‍ത്താനായിരിക്കണം ദിലീപ് ശ്രമിച്ചിട്ടുണ്ടാവുക. ആ ആഗ്രഹം തകര്‍ത്തതിനാലാവാം ഒരുപക്ഷേ ഈ പ്രതികാരം. അപ്പോഴും സംശയങ്ങള്‍ ബാക്കിയാണ്. ഏറെ സ്‌നേഹിച്ച കാമുകി ജീവിതത്തിലേക്കു പടികയറി വന്നിട്ട് ഏതാനും മാസങ്ങള്‍ മാത്രമേ ആയിട്ടുള്ളു. മധുവിധുവിന്റെ ലഹരി മാഞ്ഞിട്ടുമില്ല. ഈ ഒരവസരത്തില്‍, ദിലീപ് ഇത്തരമൊരു കൃത്യത്തിനു ശ്രമിക്കുമോ.... അതോ ഒരിക്കലും പിടിക്കപ്പെടില്ല എന്നൊരു വിശ്വാസം ദിലീപിന് ഉണ്ടായിരുന്നോ....?


ദിലീപ് പ്രതികാരം ചെയ്തതെല്ലാം സിനിമ എന്ന ആയുധം ഉപയോഗിച്ച്....


ദിലീപിന്റെ അപ്രമാദിത്വത്തെ അംഗീകരിക്കാത്ത, ദിലീപിന്റെ അതൃപ്തിക്കു പാത്രമായ ഒട്ടനവധി സിനിമാക്കാരുടെ അനുഭവങ്ങള്‍ ഇപ്പോള്‍ മാധ്യമങ്ങള്‍ പുറത്തുവിടുന്നുണ്ട്. പക്ഷേ, ആ കഥകളിലൊന്നും, എതിരാളികളെ തകര്‍ക്കാന്‍ ഗുണ്ടകളെ ഉപയോഗിച്ചതായി ആരും പറയുന്നില്ല. പകരം, സിനിമയില്‍ നിന്നും പുറത്താക്കിയും പുറത്തിരുത്തിയുമാണ് ദിലീപ് പകരം വീട്ടിയതെന്ന് എല്ലാവരും പറയുന്നുമുണ്ട്. ആക്രമണത്തിനിരയായ നടിയെയും ഇത്തരത്തില്‍ ദിലീപ് ദ്രോഹിച്ചതായി ആ നടി തന്നെ പലപ്പോഴും വെളിപ്പെടുത്തിയിട്ടുണ്ട്. ആ നടി സിനിമയില്‍ നിന്നും ഏകദേശം പുറത്താകുകയും ചെയ്തിരുന്നു. എന്നിട്ടും ഇത്തരത്തില്‍ ഒരു ക്രൂരകൃത്യം ആ പെണ്‍കുട്ടിയോടു ചെയ്യാന്‍ ദിലീപിനെ പ്രേരിപ്പിച്ച ഘടകം എന്താവും...? തന്റെ വിവാഹേതര ബന്ധം ഭാര്യയെ അറിയിച്ചതിലുള്ള വൈരാഗ്യം മാത്രമോ അത്....? സ്വോഭാവികമായും ദിലീപിന് ആ നടിയോട് വൈരാഗ്യം തോന്നിയിരിക്കാം. പക്ഷേ, ഇത്രയേറെ ക്രൂരത കാണിക്കാന്‍ തക്ക വൈരാഗ്യം ദിലീപിന്റെ മനസിലുണ്ടാക്കാന്‍ ആ പ്രവൃത്തിക്കു കഴിഞ്ഞിരുന്നോ....? സിനിമയില്‍ അവസരങ്ങള്‍ നഷ്ടപ്പെടുത്തിയപ്പോള്‍ തന്നെ ആ പ്രതികാര മനസ് അടങ്ങിയിട്ടുണ്ടാവില്ലേ....?

62 കോടിയുടെ ഇടപാട്.....


അടുത്ത കാരണമായി പറയുന്നത് ഇതാണ്. ആക്രമിക്കപ്പെട്ട നടിയും ദിലീപുമായി ചേര്‍ന്നു നടത്തിയ വസ്തു ഇടപാടുകള്‍. 62 കോടി രൂപ തിരിച്ചെടുക്കാനായി ഒന്നരക്കോടിയുടെ ബലാത്സംഗ ക്വട്ടേഷന്‍. പക്ഷേ, കണക്കില്‍പ്പെട്ടതും പെടാത്തതുമായി കോടിക്കണക്കിനു രൂപയുടെ സ്വത്തുള്ള ഈ നടന് 62 കോടി വെറും നിസ്സാരമല്ലേ.....? പണം കുമിഞ്ഞു കൂടന്തോറും മനുഷ്യന് ആര്‍ത്തിയും കൂടും. അത്തരമൊരു ആര്‍ത്തി ഒരുപക്ഷേ ദിലീപിനുമുണ്ടായിരിക്കണം. അങ്ങനെയെങ്കില്‍ 62 കോടിയേക്കാള്‍ വലിയ തുകയുടെ സാമ്പത്തിക ഇടപാടുകളും രേഖകളും ആക്രമണത്തിന് ഇരയായ നടിയും ദിലീപുമായി ഉണ്ടായിരുന്നിരിക്കണം. ആ രേഖകള്‍ ദിലീപിന്റെ നാശത്തിലേക്കു വഴിതെളിക്കുന്നവയുമായിരിക്കണം.


വിവാഹം മുടക്കുവാന്‍ വേണ്ടിയുള്ള വീഡിയോ ചിത്രീകരണങ്ങള്‍....അവയിലും ദുരൂഹത....


അപകീര്‍ത്തികരമായ വീഡിയോ ചിത്രീകരിക്കുമ്പോള്‍ ക്വട്ടേഷന്‍ കൊടുത്തയാള്‍ പ്രത്യേകം പറഞ്ഞിരുന്നുവത്രെ, വിവാഹ മോതിരവും ചിരിക്കുന്ന മുഖവും കഴുത്തും പ്രത്യേകം ചിത്രീകരിക്കണമെന്ന്. ഇരയുടെ വിവാഹം മുടക്കുന്നതിലൂടെ സായൂജ്യം നേടുന്ന വേട്ടക്കാരന്‍ ആര്...? അത് ദിലീപ് തന്നെയോ...തന്റെ കുടുംബത്തെ ഇല്ലാതാക്കിയ വ്യക്തിയുടെ കുടുംബജീവിതവും നശിപ്പിക്കണമെന്ന് ദിലീപ് ആഗ്രഹിച്ചിരുന്നുവോ....? അതോ.. ആ വിവാഹം മുടക്കി മറ്റൊരാളോ.....? അപകീര്‍ത്തികരമായ വീഡിയോ എടുത്താല്‍ ഇര നിശബ്ദയായിക്കൊള്ളുമെന്ന് തന്നെയാണോ അയാള്‍ കണക്കുകൂട്ടിയിരുന്നത്...?

ഇത് ദീലീപിനെതിരായ ഗൂഢാലോചനയോ....?



ഒന്നുമില്ലായ്മയില്‍ നിന്നും വളര്‍ന്ന് പടര്‍ന്നു പന്തലിച്ച ഒരു നടന്‍. സിനിമാലോകം ഈ നടന്റെ കാല്‍ക്കീഴിലെന്ന് ആരും കരുതിയില്ല, കാരണം അങ്ങനെയായിരുന്നു ആ നടന്റെ പുറമെയുള്ള പെരുമാറ്റം. പക്ഷേ, ഒരു കേസില്‍ അറസ്റ്റിലായപ്പോഴാണ് ഈ നടന്റെവളര്‍ച്ചയുടെ ആഴവും പരപ്പും ജനങ്ങള്‍ക്കു കൂടുതലും ബോധ്യമാകുന്നത്. മലയാള സിനിമാ വ്യവസായം ഈ നടന്റെ കൈകളിലായിരുന്നുവെന്നും ജനങ്ങള്‍ മനസിലാക്കുന്നതും അപ്പോഴാണ്. മലയാള സിനിമയെ വിരല്‍തുമ്പില്‍ കറക്കി കൊണ്ടുനടന്ന വ്യക്തിയും ദിലീപ് തന്നെയെന്ന് വാര്‍ത്തകള്‍ പറയുന്നു. കൂടാതെ, ദിലീപിനു കേരളത്തിലുടനീളം മള്‍ട്ടിപ്ലക്‌സുകള്‍ തുടങ്ങാന്‍ ആഗ്രഹമുണ്ടായിരുന്നുവത്രെ. സമീപഭാവിയില്‍ അവ പ്രാവര്‍ത്തകമാകുമായിരുന്നുവെന്നും അതോടെ മലയാള സിനിമ വ്യവസായം പൂര്‍ണ്ണമായും ഈ നടന്റെ കൈക്കുമ്പിളില്‍ എത്തിച്ചേരുമായിരുന്നുവെന്നും റിപ്പോര്‍ട്ടുകള്‍ പറയുന്നു. ഏതു സിനിമ എപ്പോള്‍ റിലീസ് ചെയ്യണമെന്നു തീരുമാനിക്കുന്ന ശക്തിയായി ദിലീപ് വളരുമായിരുന്നു. എങ്കില്‍, ദിലീപിന്റെ ദ്രോഹങ്ങള്‍ക്ക് ഏറെ പാത്രമായിട്ടുള്ളവരും സംശയ നിഴലില്‍ തന്നെയല്ലേ....? ആ തരത്തിലും അന്വേഷണങ്ങള്‍ നടക്കേണ്ടതല്ലേ....?


പോലീസിനു ലഭിച്ചിരിക്കുന്ന തെളിവുകള്‍ അപ്പോഴും കീറാമുട്ടിയായി നില്‍ക്കുന്നു. ഇര ആര്‍ക്കൊക്കെ ഭീഷണിയായിരുന്നു എന്നതും കണ്ടെത്തേണ്ടിയിരിക്കുന്നു. പള്‍സര്‍ സുനി സ്വന്തം നിലയില്‍ നടിയെ തട്ടിക്കൊണ്ടുപോയി വീഡിയോ പിടിച്ച ശേഷം ദിലീപിന്റെ ശത്രുക്കളില്‍ നിന്നും കോടികള്‍ വാങ്ങി കുറ്റം ദിലീപിന്റെ തലയില്‍ കെട്ടിവയ്ക്കുന്നതുമാകാം..... സംഭവം നടന്ന് ഏതാനും ദിവസങ്ങള്‍ക്കു ശേഷമാണ് കോടതിയില്‍ കീഴടങ്ങാന്‍ പള്‍സറും കൂട്ടാളികളും എത്തുന്നത്. കോടതിയില്‍ നിന്നും പോലീസ് ഇവരെ അറസ്റ്റുചെയ്തു കൊണ്ടുപോവുകയായിരുന്നു. ഒളിവില്‍ കഴിഞ്ഞ ആ ദിവസങ്ങള്‍ പോരെ മറ്റൊരു ഗൂഢതന്ത്രം മെനഞ്ഞെടുക്കുന്നതിന്...?

എന്തായാലും, കേരളപോലീസ് തെളിയിക്കട്ടെ ഈ കേസ്. കാത്തിരിക്കുക തന്നെ.... പക്ഷേ,പ്രതി കുറ്റം ചെയ്‌തോ ഇല്ലയോ എന്നു പൂര്‍ണ്ണമായും ബോധ്യപ്പെടും മുമ്പുള്ള ഈ കൊലവിളി എന്തിന്...? ദിലീപ് കുറ്റും ചെയ്തിട്ടുണ്ടെങ്കില്‍ കഠിന ശിക്ഷ തന്നെ കിട്ടണം. പക്ഷേ, ജനക്കൂട്ടത്തിന്റെ നീതി തെറ്റായിരുന്നു എന്നു തെളിയിക്കുന്ന നൂറു നൂറ് ഉദാഹരണങ്ങളുണ്ട് നമുക്കു മുന്നില്‍. ഐ എസ് ആര്‍ ഒ ചാരവൃത്തിക്കേസ് ഉള്‍പ്പടെ.... അതിനാല്‍, ഈ ആവേശം ഒട്ടൊന്നു കുറയ്ക്കുന്നതാണ് ഏവര്‍ക്കും നല്ലത്.


Share:

FACEBOOK

Google+ Followers

AnaEzine.webs

I am the Author

Enter your email address:

Delivered by FeedBurner

Joice Media Group. Powered by Blogger.

Sponsor

"; var Fscroll = scroll.replace(/(\r\n|\n|\r)/gm," "); if ( Fscroll === "yes" ) { $(document).ready(function() { $('body').addClass('imgani'); }); $(window).bind('load resize scroll', function() { var window = $(this).height(); $('.block-image .thumb a,.feat .primeiro .feat-thumb a,.feat ul li .feat-thumb a,.related li .related-img,.roma-widget .wid-thumb a,.PopularPosts ul li img,.cmmwidget li .avatarImage img').each(function() { var qudr = .1 * $(this).height(); var omger = qudr - window + $(this).offset().top; var lom = $(document).scrollTop(); if (lom > omger) { $(this).addClass('anime'); } }); }); } //]]>

Find Us On Facebook

Awesome Video

About us

തമസില്‍ നിന്നും ജ്യോതിസിലേക്കൊരു യാത്ര... അത് അത്ര എളുപ്പമല്ലെന്ന് അറിയാതെയല്ല. എല്ലാം ഒറ്റയടിക്കു നേരെയാക്കിക്കളയാമെന്ന ആവേശമോ ഒറ്റക്കൊരു പട്ടാളത്തെ നയിക്കാമെന്ന അഹങ്കാരമോ ഇല്ല. ഉണ്ടായേക്കാവുന്ന എതിര്പ്പുാകളെയെല്ലാം മുന്നില്‍ കണ്ടുകൊണ്ടുള്ള ഒരു യാത്രതന്നെയാണിത്. ഞങ്ങള്‍ ഇവിടെ കൊളുത്തുന്നത് ചെറിയൊരു കൈത്തിരി നാളം മാത്രം. ഇതിന് ശക്തിയും ഊര്ജ്ജ്വും പകരേണ്ടത് ലക്ഷോപലക്ഷം വരുന്ന വായനക്കാരുടെ ഹൃദയത്തില്‍ നിന്നും ഉയിര്കൊ‍ള്ളുന്ന നന്മയുടെ ചെറുജ്വാലകള്‍ കൊണ്ടാണ്.

Search This Blog

Flickr

Sponsor

About Me

My Photo

Journalist with 15 years of experience. Double post graduate in Economics and Journalism. Worked with Kerala Kaumudi, McMillan Bangalore and Tech Plus Media Pvt Ltd, New Delhi. Founder of Joice Media Group. 

Contact us

Name

Email *

Message *

Translate

Video of the Day

Flickr Images

Services

The Magazine

Bonjour & Welcome

Popular Posts

Recent Posts

Enter your email address:

Delivered by FeedBurner

Unordered List

Pages

Theme Support

Definition List